Zofest 2-18-ah Cultural Day an hmang

Mizo Zirlai Pawl (MZP) chuan Reiekah Zofest an hmang mek zel a, nimin khan Reieka Zokhua-ah Cultural Day hman niin, Cross Remliana, counsellor, Rangamati Hills District Council, Bangladesh chu khuallian a ni. MUP president RK Thanga'n a hmanpui bawk.

Khuallian Cross Remliana chuan, Mizoram chhung aṭang Mizote insuihkhawm theihna tura nasa taka hmalak a ni leh Zofest buatsaih a ni chu lawmawm a tih thu sawiin, "Zo fate hi ram hrang hrangah cheng mai ila, hnam khata siam chawp, phuahchawp kan ni lo a, Pathianin duh taka a siam chhûl khat kual kan ni a, eng emaw chhuanlam hmanga ṭhen hran theih kan ni lo," a ti.

Cross Remliana chuan, ram pathum - India, Myanmar leh Bangladesh-a cheng Mizote hun lo kal zel turah Pathianin rorelna pakhat hnuaiah a la chhûn khawm ngei a rin thu a sawi a; khawvel hmun hrang hranga cheng Mizote chu an awmna ram ṭheuhah hnam nunphung, chîn dan leh sakhuana vawnghim zel turin a chah.

MUP president RK Thanga pawhin thu sawiin, Mizote chu an duh vanga ṭhen darh an ni lo tih a sawi a, "Khawvel hmun hrang hrangah Zo fate hi kan cheng a. Pathianin hun ṭha min pe ang a, engtikah emaw chuan rorelna pakhat hnuaiah kan la awm ang tih hi MUP chuan a ring tlat a ni. Chutiang a thlen theihna tur chuan Zo hnahthlak hnam péng hrang hrangte hi inla hrang lo ila, unau kan nihna hi pawm tlang ila. Zo hnahthlak hnam ṭawng hrang hrang erawh indîpdâlsak lo ila, chu chuan hnam ropui takah min hláng kai dawn a ni," a ti.

Zofest cultural programme-ah hian Mizo hnam lâm chi hrang hrang entir niin, zaithiamte an zai a; nizan khan an hman chhunzawm bakah, vawiinah pawh an leh ang a, zaninah a ṭiak ang.



Share this Post

Login to comment
No Comments