Armed Forces Flag Day thuchah tichhuak

Vawiin, December 7 hi Armed Forces Flag Day a ni a; he ni pual hian Governor Kummanam Rajasekharan chuan thuchah tichhuakin, Armed Forces Flag Day chu ram leh mipui venghim tura nun lo hlân tawhtu sipaite leh tuna sipaia ṭang mek­te chawimawina leh zahna lantirna hun a nih thu a sawi.

India sipaite chu vûr hnuaiah leh khaw vawt tak karah te , ei leh in tur awm mumal lohna hmunah te, hun khirhkhan tak tak karahte rinawm takin ram tan an ding tlat tih sawiin Larsap chuan, "Khawmualah te, tuipui chungahte leh boruakahte kan ram venhim hna thawktute an ni," a ti.

Governor chuan, "Armed Forces Flag Day-ah hian army, navy leh air force-a thawk, nula leh tlangval huaisen, kan ram ropui tak venghim tura nuna hlantute inpeknate hre thar leh turin kan inchah a ni," a ti a; ramn leh mipui tana inpekna nasa tak avangin sipai martar chhungkaw tam tak chu retheihnain a tlakbuak tih sawiin, sipai zingah kuttual leichhama awm phahte pawh hre reng turin mipui a chah.

Kummanam Rajasekharan sawi danin, Armed Forces Flag Day hman chhan langsar zualte chu - indonaa sipai thi, hliam leh indona vanga harsatna tawk sipaite dinhmun siamṭhat te, sipai bángte leh an chhungkuate'n in leh lo an din ṭhat leh theihna tura ṭanpui leh an hamṭhatna ngaihtuahsak te leh, sipaia ṭang mek leh an chhungte puala hamṭhatna ngaihtuahsakte a ni.

Governor chuan, ram a rálmuan lai chuan sipaite'n ram dan leh thupek kenkawh kawngah sorkar an pui ṭhin tih sawiin, "Thlipui, tuilian, lirnghing leh thil dangte vanga khuarel chhiatna a thlen thulhah chhanchhuah hna an thawk ṭhin. Kan sipaite hi kan ram ropuina, zahawmna leh inpumkhatna venghimtute an nih avangin kan chhuang tak zet a ni," a ti a; sipai martarte'n an kalsan an nupui fanau leh an nu leh pate chhawmdawl leh ngaihsak chu ram mipuite tih tur a nih thu a sawi.



Share this Post

Login to comment
No Comments