Candidate thubuai neite chungchangah Political party-te an insawifiah tawh

Chief electoral officer (CEO) Ashish Kundra chuan, Mizoram Assembly inthlan neih zawh taka candidate zinga criminal case neite,  media-a an thubuai puanzar a nih danah political party-te an insawifiah tawh thu a sawi a, "Dr BD Chakma affidavit thehluh chu zir chian a ni ang," a ti. 

Vanglaini palai zawhna chhangin Ashish Kundra chuan, candidate criminal case neite'n an thubuai an puanzar danah complaint an dawnte chu an bawhzui thu a sawi a, "Political party-te an rawn insawifiah tawh a, an candidate thubuai neite thubuai chungchang media kaltlanga an puanzar ngei thu an rawn tarlang a ni," a ti a, political party-te insawifiahna chu an pawm thu a sawi.

Media darh zaua an candidate-te thubuai puangzar lo political party an awm chungchanga zawhna chhangin CEO chuan, "Thubuai hi an puanzar ngei avangin tunah chuan tih theih a awm tawh chuang lo. Inthlan lo la awm zel tur atan erawh media darh zaua thubuai neite thubuai puanzar a nih ngei theihna atan hmalak a ngai a ni," a ti. 

Mizoram CEO chuan, Tuichawng biala BJP candidate Dr Buddha Dhan Chakma chu criminal case nei reng si, affidavit-a tarlang loa puh a nih chungchangah, Additional CEO-in a chhui chian tur thu a sawi.

Assembly inthlan neih zawh tâka vote tlate chu ṭum dang aiin a chhiar chhung a rei loh tur thu sawiin Ashish Kundra chuan, "Inthlan hmasakte kha chuan Aizawl district pawh hmun khatah chauh vote chhiar a ni a, chhiar chhung a rei a ni. Tun ṭumah chuan constituency hrang hrangte hmun hran hranah chhiar a nih dawn avangin ṭum dang ai chuan vote chhiar chhung a rei lo turah kan ngai," a ti.

PRISM party chuan candidate-te thubuai puanzar a nih dan leh Dr BD Chakma affidavite thehluh chungchangah Mizoram CEO hnenah complaint an thehlut a ni. 



Share this Post

Login to comment
No Comments