MZP huaihawt ZOFEST hmang mek

MZP general headquarters chuan December 4, Thawhlehni zan aṭang khan Reiekah ZOFEST 2018 an hmang ṭan. Zofest neihna atan hian Reiek khelmualah pandal an sa a, a hmingah 'Zo Inpui' an vuah a; thupui chu 'Unau kan ni' tih a ni.

Nimin khan Planning secretary Dr C Vanlalramsanga chu khuallian a ni a, Central YMA president Vanlalruata pawhin a hmanpui. Dr C Vanlalramsanga chuan, Mizote chu khawvel hmun hrang hrangah an awm darh tih sawiin, "Khawvel pum­ah chên lohna kan nei tlem tawh hle a, kan awmna apiangah society leh welfare-te siamin kan inzawng chhuak zel hi thil lawmawm tak a ni a, kan in­unauna kan chhawm nung ṭha hle a ni," a ti.

Dr C Vanlalramsanga chuan, "Zo fate hi inunauna leh inlungrualna tel lo chuan insuih­khawm a theih ngai dawnlo a, hmasawnna hmangin insuih­khawmna kawng zawh ila; rilru dik, sakhua dik, rinawmna leh taimakna nen insuihkhawm leh zai i rel ang u," tiin, Zofest-a telte a chah.

CYMA president Vanlalruata pawhin thu sawiin, "Khawvelah tam a pawimawh em em a, hnam anga hriat hlawh tur leh dam khawchhuak turin Zo fate kan insuihkhawma kan ṭanrual a ngai. Mahni hnam zia leh incheina zahpui apiang an dingchhuak ngai lo a, kan hnam ziaráng leh inchei­nate kan uar zel a ngai. Kan chenna ṭheuhah rinawm takin awm ila, puih kan ngaihna apiang­ah i inpui tawn zel ang u," a ti.

Nimina Zofest-ah hian chawhnu lamah Reiek Convention Center-ah, 'Insuihkhawm leh Mizo ṭawng' tih thupui hmanga Dr C Lalawmpuia Vanchiau paper buatsaih zirho a ni.

Zofest-ah hian Mizoram bakah, Myanmar, Bangladesh, Manipur, Tripura, Arunachal Pradesh leh Assam aṭangin palai 800 vel an kal a; hnam làm leh zaite pawh an entir a ni.



Share this Post

Login to comment
No Comments