Mizoram MP hlui kum 3 táng turin hrem Court thutlukna ka khing let dawn - Lalhmingliana

Mizoram aṭanga Rajya Sabha member (MP) hlui Lalhmingliana chu thlawhtheihna ticket (air ticket) lem hmanga travelling allowance la (reimburse)-a puhna thubuaiah thiam loh chantir a ni a; Delhi Court chuan kum thum chhung táng tur leh Rs. 11,00,000 chawi turin a ti. Lalhmingliana chuan Court thutlukna hi a khin let tur thu a sawi.

Press Trust of India-in a tarlan danin, Lalhmingliana hi Indian Penal Code (IPC) hnuaiah leh Prevention of Corruption Act (PC Act) hnuaiah thubuai siamsak a ni a; a thubuaiah hian Special CBI judge NK Malhotra chuan November 29, 2018 khan thiam loh a chantir a, November 30 khan hremna tur a puang chhuak a ni.

Court thutlukna hi a duh chuan Delhi High Court-a a khin lêt (appeal) theih nan statutory bail a phalsak thung.

Judge sawi danin, Lalhmingliana hian a computer hmangin e-ticket lem a siam a, chu'ng ticket lem hmang chuan Rajya Sabha Secretariat aṭangin travel allowance (TA) bill a la a, heng TA bill-te hi kum 2012-13 chhungin a thehlut a ni.

Court thutlukna tarlan danin, Lalhming­liana'n TA bill Rajya Sabha Secretariat-a a thehluh chu Rs. 11,19,926 a ni a, chutah chuan a thurualpui (companion)-te zinna leh companion free scheme (CFS)-a thlawhna chuan man dik tak Rs. 81,373 pawh a tel.

Document lem hmanga Rajya Sabha Secretariat aṭanga sum lak chhuah zawng zawng chu Rs. 10,36,533 vela ngaih a ni.

July 2008 aṭanga July 2014 thleng Mizo­ram aiawha Rajya Sabha MP Lalhming­liana chungchang hi Central Bureau of Investigation (CBI)-in an chhui a, Delhi Court chuan August 2015-ah thubuai a ngaihtuah ṭan a ni.

Vanglaini palai zawhna chhangin Lalhmingliana chuan Court thutlukna hi a khinlet dawn thu a sawi a, "Kar leh hian Delhi-ah ka chhuk thla ang a, thil ṭul ang angte buaipuiin, kan khinglet ang," a ti.

Lalhmingliana chuan thubuai a neih hnuah ukilte ruaiin, an buaipui ve reng tih sawiin, "Ka ukilte nen pawh kan inbe reng a, thil dik lo hai chhuah tur an hmuh loh thu min hrilh reng a ni. Chutiang a nih laia hetianga thutlukna a lo awm ta thut hi kei pawhin mak ka ti hle," a ti a, an puhnaah hian tih dik loh neia a inhriat loh thu a sawi.

A thubuai ngaihtuahtuahna hmun an sawn thut tih sawiin Lalhmingliana chuan, "Ka thubuai ngaihtuahna hmun hi an thlak thut a, case history engmah hre loin thutlukna a siam a ni. Thil dik tawk lo a awm thei em tih ka ngaihtuah," a ti.



Share this Post

Login to comment
No Comments