Annual Art Exhibition neih mek a ni

Mizoram Art Development Society (MADS)-in ni li chhung an member-te kutchhuak lemziak leh lemtuk phochhuahna, MADS Annual Art Exhibition vawi 6-na an buatsaih chu Archives Hall-ah neih meka ni a, November 6, Thawhlehni khan IPR director David L Thangliana'n a hawng.

David L Thangliana chuan, mi 47-te kutchhuak 172 phochhuahna Art Exhibition buatsaih a ni chu lawmawm a tih thu sawiin, "Exhibition-ah hian artist-te kutchhuak thar, khawi hmunah mah la târ chhuah loh hmuh tur a awm avangin art lamah hmasawnna nasa tak kum tin a awm a ni," a ti.

IPR Director chuan, IPR department chu visual art  enkawltu department a nih angin, art tihhmasawn kawngah theihtawp a chhuah reng thu a sawi a; tun thlaah New Delhi-a Rajiv Gandhi Indoor Stadium-ah Mizote kutchhuak phochhuah a ni dawn tih a sawi bawk.

Art Exhibition hi November 6-9 chhung neih a ni dawn a, chawhma dar 10 aṭanga tlai lam dar 5 thleng tlawh theih a ni.



Share this Post

Login to comment
No Comments