Kawnpui NGO-te'n police hotu hliam an kan

YMA Awithangpa Group office bearer te, Kawnpui Joint YMA, Joint MHIP, MUP leh MZP sub-hqrs hruaitute chuan 1st. IR commandant J Lalṭhafamkima chu Thawhlehni zana Kolasib DC pisaa mipuiin lung­awi lohna an lantirnaah a hliam avangin nimin khan a chenna bangla-ah an kan.

Tlawmngai pawl hruai­tute chuan, 1st. IR commandant chu November 5, Thawhṭanni zana mipuite'n Election duty kal tur motor an dan laia boruak muanawm tak nei theia Kolasib leh Kawnpui a enkawl theih vang te, Thawhlehni zanah Kolasib DC compound chhung­a buaina thleng chinfel chungchangah Mizo rilru pu tak leh tlawmngaihna sang tak nei chunga pungkhawmte a hma­chhawn theite chu lawm­awm an tih thu an hrilh.

J Lalṭhafamkima chuan, Kolasib leh Kawnpuia tlawmngai pawl hruai­tute leh sorkar officer-te an puitling a, thawhpui an nuam tih sawiin, a lú-a hliam chu tihpalh thil a ni thu a sawi a, "Mi tumahin amah mimal taka an huat bik vanga ti angin ka ngai lo a, vanduai zingah ka tel ve a ni," tiin, rilru dam taka a tawrh thu sawi.

IR Commandant chuan, sorkar mi leh sa a nih anga a hna a thawhnaah, mi rilru ná a siam ang tih a hlau hle tih a sawi a; Kolasib mipuite'n zah taka an dawnsawn avangin a lawm thu a sawi bawk.



Share this Post

Login to comment
No Comments