Manipur Mizote'n Joint NGO an thláwp

Manipur-a Mizo pawl hrang hrang - Mizo People Convention (MPC), YMA leh Mizo Zirlai Pawl-te chuan thuchhuah inṭâwm siamin, Lalnunmawia Chuaungo laka Mizoram chief electoral officer SB Shashank-a thil tih dan chu an dem a, Shashank chu Mizoram aṭanga sawn chhuah an phût thu leh, chumi tura NGO Coordination Committee hmalakna an thlàwp thu an tarlang.

Mizoram Home secretary aṭanga sawn chhuah tak Lalnunmawia Chuau­ngo laka Mizoram CEO thil tih dan chu Mizo mipui tithinrimtu leh nunphung pangngai tibuaitu a nih thu sawiin Manipur-a Mizo pawlte chuan, "SB Shashank hian a thuneihna a hmang dik lo a, Mizoramah CEO ni zel tlak a ni lo," an ti.

SB Shashank-a'n Lalnunmawia Chuaungo a puhnate chu awmze nei lo leh kum 2014-a Election Commission of India-in thutiam a lo neih tawh palzûtna a nih thu an sawi a, "SB Shashank hian ECI thutiam leh Bru lak let chungchanga inremna siam tawhte a bawhchhia a ni," tiin, chuvang chuan Mizorama CEO hna thawk zel tlak a nih loh thu an sawi.

CEO Shashank-a'n state rálmuang Mizoram inthlana duty tura central armed police force (CAPF) company 40 a chah chu thil awm lo leh ṭul hauh loa Mizoram sorkar sum cheng nuai 1100 vel senna tur a nih thu an tarlang a, "Hemi chungchang Home Secretary-in a zawtfiah hi a tih tur dik tak a ni," an ti.

Manipur-a Mizo pawlte chuan, CEO SB Shashank-a thil tih dan chu ama thua a tih vek a ni loa an ngaih thu leh politics thila thununtu an awm vanga an ngaih thu an sawi bawk.



Share this Post

Login to comment
No Comments