BJP thanga âwk lo turin mipui chah

Congress party chuan thuchhuah siamin, NGO Coordination Committee-in Mizoram pum huap­a Hnam Hnatlang an huaihawt chu Congress party-in ṭha an ti a, an thlàwp tlat thu an tarlang a; chumi rual chuan, BJP thangkamah inawhtir lo turin mipui an chah.

MPCC thuchhuah chuan, Mizoram Home Secretary sawn chhuah chungchangah chief minister Lal Thanhawla'n a ngaihdan a lo sawi tawh angin, transfer a nihnaah thil dik tâwk loa inhêkna a awm thu a tarlang a, "Principal Secretary of Home hi Mizo pa, keini leh Mizo dang zawngte ang rilru pûa, Mizo tan thil ṭha ber duh a ni. Mizoram ṭhatna tur leh ECI-in kum 2014-ah order a siam tawh Tuikuk  raltlan Tripura mite'n vote an neihna Mizoram chhung ngeiah vote thlak ve tur a lo tih tawh chu kal tlangpui ni se, tih hi Congress party duh dan leh ngaihdan a ni," an ti.

Congress party chuan, Joint NGO hmalak tawhna leh SB Shashank sawn tura an hmalakna kal zel chu an thlàwp zel dawn thu sawiin, "He buaina verther tak lo chhuah chhan chu BJP an ni. BJP thangkamah Mizo mipui­te âwk lo a, muanawm taka Zoram pumah Hnam Hnatlang inlung­rual takin kal zel se. In­thlanna muan­awm kan neih theihna tur tikhaihlak zawnga chêt hi tute emaw Mizoram hmangaih lotute duh dan a ni," an ti a; Mizo mipuite chu huaisen tak, muanawm tak siin pheikhai rual taka party politics dahṭhaa kal zel turin an chah a ni.



Share this Post

Login to comment
No Comments