MZP leh ZPM hruaitute an inkâwm

MZP hruaitute chuan nimin khan Zoram Peoples' Movement (ZPM) hruaitute chu ZPM pisaah kal chilhin an kâwm a; MZP-in a ngaih pawimawh - ramri, Mizorama ram dang mi dan loa awmte leh Lok Ayukta chungchanga an hmalakna tum dante an sawipui.

MZP president L Ramdinliana Renthlei chuan, MZP-in Mizoram leh Assam ramri chungchanga hma an lak tawh dante sawiin, ramri hrûlah sipai tam zawk dah a ṭul thu a sawi a; Mizoram ramrite a him zawk nan Boundary Development Department siam a pawimawh an tih thu sawiin, ZPM chu sorkar ta se, MZP-in Bairabi Zophaia Zofate Chawlhbuk a sak theih nana hmalak an tum dan a zawt a ni.

ZPM Steering Committee vice chairman Dr Kenneth Chawngliana chuan, ZPM-in policy tam tak an nei tih sawiin, "Kan policy leh manifesto-te hi kan ziak satliah lo a, kan sorkar chuan a takin hma kan la dawn a ni. Kan sorkar chuan Boundary Commision kan din ang a, ramri enkawl tur bik department kan siam ang a, ramri enkawltu tur bik minister pawh kan dah dawn a ni," a ti.

Kenneth Chawngliana chuan, ramri hrûlah police force dah chu ZPM chief minister candidate Lalduhoma'n a ngaih pawimawh thu sawiin, "Kan sorkar chuan a rang thei ang berin hma kan la ang a, ramri hrûlah police force ṭhahnem zawk kan dah dawn a ni," a ti a; Bairabi Zophaia MZP-in Zofate Chawlhbuk sak an tum pawh chak taka bawhzuipui an tum thu a sawi.

MZP hruaitute chuan, ZPM chu zirna chungchanga an hmalak an tum dan hrang hrang an zawt a; School Education department-a thawk tur bik Mizoram Education Service siam te, zirtirtu indaih lohna, Education budget tam zawk dah leh Mizo zirlaite central service/civil service-a tam zawk an luh theih dan turte an sawipui.

Zirtirtu indaih lohna chu an vei thu sawiin Kenneth Chawngliana chuan, "Zir chianna pawh chi hrang hrang kan nei tawh a, zirtirtu kan indaih ngei theih nan hmalak kan tum a, thingtlang sikulte'n zirtirtute awmna in (quarters) neih vek tura hmalak kan tum. Hei hian transfer & posting-ah pawh hma min sawnpui kan ring," a ti.

Kenneth Chawngliana chuan, Education Service siam an ngai pawimawh tih sawiin, "Mizoram Education Service siam a nih theih nan hma kan la dawn a, Education-a hmasawn turin budget tam zawk dah kan tum bawk," a ti a; all Indian service leh central service-ah Mizo tam zawk an luh theih nan hmalak an tum thu a sawi.

Mizorama dan loa awm Chakma foreigner chungchanga ZPM hmalak tum dan zawhna chhangin ZPM hotute chuan, Mizorama dan loa Chakma foreigner awmte chu an ngai pawimawh thu a sawi a, "Kan sorkar a nih chuan foreigner-te hi a rang thei ang bera Mizoram an chhuahsan theihna turin hmalak kan tum. CADC area-a Zo hnahthlak awmte tan a bik takin hmalak kan tum a, hmasawnna pawh nasa taka pek kan tum," an ti.

Eirukna dona tur Lok Ayukta chung­changah ZPM Steering Committee Vice Chairman chuan, "Eiruk do chung­changah nasa takin hmalak kan tum a, manifesto-ah pawh kan ziak lang. Lok Ayukta hi rang taka a function theihna turin hma kan la dawn a ni," a ti a; ZPM an sorkar chuan Lok Ayukta din nghal an tum thu a sawi.

MZP hruaitute hian political party hruaitu dangte pawh la kawm zel an tum a; Lok Ayukta, ramri chungchang, zirna lam leh Chakma foreigner-te chungchanga an hmalak tum dante an sawipui zel dawn a ni.



Share this Post

Login to comment
No Comments