Police-in harsatna siam lo turin an ngen

Nimin chawhnu dar 2 khan Mizoram director general of police (DGP) Balaji Srivastava leh Mizoram police officer-te'n Aizawl SP pisaah NGO Coordination Committee hruaitute an kâwm a; Mizoram inthlanpuia duty tur state pawn aṭanga central armed police force (CAPF)-te lak luh kawngah harsatna a awm loh nana hma la turin an ngen.

Police officer-te chuan, November 28, 2018-a Mizoram inthlanpuia venhimna hna thawktu (force) hman dan tur an sawifiah a; state páwna force koh luh turte phurhna atana lirthei hmanteah mipuiin harsatna an siam loh nana hma la turin an ngen a ni. Joint NGO hruaitute pawhin, Mizoram CEO SB Shashank a haw rih avangin, CAPF lak luh kawngah harsatna siam lo tura hmalak an tum thu an sawi.

Mizoram Police chuan nimin khan ‘Ram leh hnam inpumkhatna i vawnghim zel ang u’ tih thupuia hmangin thuchhuah an siam a; chi leh chi inkara inhmuh thiam lohna thlen thei leh tharum thawhna lam hawi thu social media-a thehdarh lo turin mipui an ngen.

Police thuchhuah chuan, "Kan tunlai boruak leh dinhmunah hian, Mizoram mipuite'n harh fîm taka engkim dan ang zela kan tiha kan kalpui a ngai a ni. Kan ram tana ṭha lo tur emaw, sorkar leh mipuite hming­chhiat theihna kawng hrang hrangah fimkhur tlang turin kan inngen nawn leh a ni," a ti.

"A bikin chi leh chi inkara inhmuh thiam lohna thlen thei leh tharum thawhna lam hawi thu leh hlate social media kaltlanga vawrh darh loh hram tum turin mipui kan ngen a ni," an ti a; thu dik leh dik lo chian hmasa loa hnam leh hnam inkara inhmuhmawhna thlen thei thu leh hla vawrh darh lo turin mi tin an ngen a ni.

Police statement chuan, Mizorama cheng hnam hrang hrang - Mizo, Vai, Bru, Chakma, etc. khua leh tui dik takte thlamuang taka an khawsakho dial dial theih nan harsatna siam lo tur leh, a hnua inchhir lehna tura thil ti lo turin mipui a ngen a, "Hnam hrang hrangte India khua leh tui dik takte chu thlamuang taka kan chenho theih nan leh kan hma lawka inthlanpui hlawhtling tak kan neih theih nante kan ṭan rual a ngai. Hemi kawnga hma la ṭheuh turin Mizoram Police chuan mi tin kan ngen a ni," an ti.



Share this Post

Login to comment
No Comments