Bru-te roll aṭanga paih turin intiam

Kolasib Joint NGO leh mipuiin na taka an nawr hnuah Kolasib district election officer Dr Arun T, district bawrhsap ni bawk chu electoral roll-a Bru voter 600 vel thun tharte paih turin a intiam a; DEO pisa kawta mipui pung­khawmte pawh Thawhlehni zan dar 12 pelhah an ṭîn darh.

Kolasib aṭanga thu dawn danin, Kolasib DEO-in electoral roll-ah Bru eng emaw zat a thun thar vanga lungawi lohna lantirin Thawhlehni tlai aṭangin Kolasib mipuite DC pisa kawtah an pungkhawm a; zan lamah boruak sosáng zelin, police leh mipui an inawr a ni. Mipui lamin DC pisa building chu lungin an vawm a, tukverh an vawm chhe nual. Police lamin mipui hnawh darh nan tear gas (mittui tlakna) an hmang bawk.

Mipuiin DEO pisa an vawm­naah 1st. IR commandant J Lalṭhafamkima chu a luhah vawm fuh a ni a, damdawi-inah hruai niin, a lu kak ṭhui a ni. Buaina a tawp theih nana bán phartu kohhran hruaitute zinga pastor pakhatin a hliam bakah, mi dang tlem azawngin hliam tenau an tuar nia thu dawn a ni. 

Thawhlehni zana Kolasib-a buainaah hian Kolasib district magistrate (DC) Dr Arun T chuan mipui hnawh darh nan silaia mipui kah phalna (firing order) a pe nia sawi a ni a; hemi chungchangah hian sorkar thuchhuah chuan firing order a pe lo niin a tarlang thung.

Nimina sorkar thuchhuab chuan, "Kolasib DC office tawn a nih chungchangah Kolasib DC-in firing order a pe tih thu thang a awm a, Kolasib DC Dr Arun T, IAS chuan firing order a pe lo. Kolasib DC chuan firing order a pek loh thu a sawi a, Cr.PC 144 (mi panga aia tam pun khawm phal lohna) tlawhchhan thupek erawh a siam a, he order hi November 6, 2018 aṭangin sûtna thupek a awm leh hma chuan Kolasib district-ah hman a ni ang," a ti.

Hetih lai hian, Thawhlehni zan vek khan Joint Chief Electoral Officer Zorammuana chuan Ko­lasib DEO/DC hnenah lehkha thawnin, electoral roll-a Bru mi eng emaw zat thun belh dilna awm chu ennawn leh turin a hriattir.

Joint CEO lehkha chuan, "Spe­cial Summery Roll Revision 2018-a Bru camp-a application lutte appeal-naah i thutluknate chu a dik tawk loa hriat a ni a, chuvangin, appeal zawng zawng hi ennawn leh vek tura hriattir i ni a. Dik lo taka accept-te chu Form-7 hmanga delete vek tura hriattir i ni. Appeal-te hi khawtlang hruaitute leh NGO-te awm lai ngeiin ennawn leh tura hriattir i ni e," a ti.

Kolasib aṭanga thu dawn danin, Joint CEO aṭanga thupek a awm avangin Kolasib DEO chu Bru voter-te chungchang ennawna paih turin a intiam a; vawiin hian Joint NGO hruaitute chu DEO pisaah an leng dawn a, thil pawimawhte an sawiho dawn a ni. 



Share this Post

Login to comment
No Comments