ZPM-in bial 25-30 vel kan la dawn - K Sapdanga

Aizawl East-I biala Zoram Peoples' Movement (ZPM) candidate K Sapdanga chuan, Pathian leh mipui zarah ṭangrual pawlin sorkarna an chan chuan veng tlabirh leh veng mawng lam aṭangin hmasawnna hna an thawh dawn thu a sawi a; Assembly constituency 25-30 velah ZPM-in hnehna an chan ngei an beisei thu a sawi bawk.

K Sapdanga hian nimin zing khan Zuangtuia ZPM campaign office a hawnnaah thu sawiin, "Congress party boruak ṭha lo karah an inchhuahsan mek a, a chhuahsantute hian ZPM zawm a, MLA candidate an beisei a, mahse, bial ruak kan lo neih loh vangin party dang an sâwm mek a ni," a ti a; chu chuan sorkar lai tlûkchhiat mek dan a hril hle tih a sawi.

Aizawl East-I bial chu ruling MLA-in an lo enkawl ngar ngar tawh tih sawiin K Sapdanga chuan, chuti chunga bial enkawl loh a ni reng chu a vei thu a sawi a, "He bialah hian chhungkaw eng zatin nge mual êng hmu pha lo tih pawh hriat a ni lo a, a rapthlak hle. Pathian leh mipui zarah sorkar ngei turah kan inngai a, kan sorkar chuan veng mawng ber aṭangin hmasawnna hna thawh a ni ang," a ti.

K Sapdanga chuan, Assembly constituency 25-30 velah ZPM-in hnehna an chan ngei an beisei thu a sawi a, "Tunah hian Pathian hriak thih sorkar tun din a lang ruau ruau tawh a ni," a ti a; Aizawl East-I bialah pawh MNF-in an party president meuh an dah chu an in chhirthehna ber a ni tawh nia sawiin, MNF chu an buai mek niin a sawi.

Ni hnih chhung Mizoram Chief Election Commissioner (CEO) duh loh lantirna chu ZPM-in lawmawm an tih thu sawiin Sapdanga chuan, "Hnam chhan tura khatiang em ema Mizo ṭhalai rual pun khawmna kha a la awm lo a, kha kha ṭangrual pawl ni lo, pawl dang tan hmuh hrehawm khawp a ni. Tuikuk vote hi party hrang hrangin an duh a, keini ṭangrual pawl chuan langtlang takin kan duh lo a, huaisen takin kan hnâwl a ni," a ti.



Share this Post

Login to comment
No Comments