Hnam Hnatlang neih chhunzawm a ni ECI-in Mizoramah palai a tír leh dawn

NGO Coordination Committee chuan nimin khan Aizawlah Hnam Hnatlang an ko leh a, mipui ṭhahnem tak Chief Electoral Officer pisa kawtah an pung khawm. Khaw dang ṭhenkhata pawh Hnam Hnatlang neih leh a ni bawk. Hetih lai hian, Election Commission of India (ECI) chuan nimin khan thuchhuah siamin, Mizoram dinhmun enfiah turin ECI-in high level team Mizoramah a rawn tirh leh dawn thu a tarlang. 

Nimina Hnam Hnatlangah hian Aizawla YMA branch zawng zawng thawk chhuak loin, Central YMA ruahman angin branch YMA 15-a mipuite an thawk chhuak.

Nimina thawk chhuakte chu - Tuikual South, Venghlui, Tuikual North, Tuikhuah­tlang, Khatla, Mission Veng, Saron Veng, Dawrpui, Zarkawt, Chhinga Veng, Electric Veng, Upper Republic, Dawrpui Vengthar, Dinthar leh Chanmari-te an ni.

Hnatlangte hi zing dar 8:30-ah an thawk chhuak ṭan a;  Mizoram CEO SB Shashank-a ECI-in a koh anga New Delhi-a kal tura Aizawl aṭanga a chhuah hnu, chawhnu dar 1:00 velah an ṭîn darh a ni.

SB Shashank hi Election Commission of India (ECI)-in New Delhi-a kal tura an tih anga kal a ni a, vawiinah ECI hotute nen an inkâwm ang. Transfer order chhuah a la awm lo a, Mizoramah a kir leh dawn leh dawn loh sawi theih a ni rih lo.

Hnatlangah hian Joint NGO secretary Lalhmachhuana chuan, ECI palai mi pathum, Thawhlehnia Aizawla rawn kalte nen Chief Secretary conference room-ah an inkawm thu sawiin, ECI palaite pawhin an thil hmuh dan ECI-ah an thlen nghal thu a sawi a, "Vawiinah Mizoram an chhuahsan hmain an thlenna hotel-ah kalin, kan resolution siam tharte kan pe leh a, rei vak lo kan inkâwm bawk," a ti. 

Lalhmachhuana chuan, ECI palaite nen an inkâwmna aṭangin a rûk tak chuan ka lawm tih sawiin, "Ziakin thu chiang la awm lo mah se, kan lawm ru viau. Anni hian kan duh dan ang zawngin report ECI-ah an thlen niin kan hria," a ti a; an inbiakna aṭang chuan, ECI chu April 7, 2014-a ziaka an intiam tawhah an din tlang an beisei thu a sawi.

Joint NGO Secretary chuan, CEO SB Shashank chu ECI hotute'n New Delhi-ah an ko thla tih sawiin, "Delhi-ah a chhukthla ang a, a lo lêt leh a beiseiawm tawh lo," a ti.

Hetih lai hian, nimina Election Commi­ssion of India (ECI) chuan nimina  thuchhuah chuan, Mizoram Assembly inthlan leh a kaihhnawih enfiah turin November 6, 2018-ah officer pathum Aizawlah tirh an nih thu sawiin, November 6-ah NGO Coordinatioh Committee hruaitute leh kohhran hruaitute nen an inkawm thu a tarlang a; November 7-ah Joint NGO chuan ECI-ah resolution an thehluh leh thu a sawi.

Mizorama inthlanna rálmuang leh zalen tak awm tawh ṭhin chu ECI-in a ngaihhlut thu sawiin ECI chuan, "Tuna thil awm dan enfiah turin Commission chuan vawiin (November 7) hian meeting a nei nghal a, inhriatthiamna a awm theih nan hmalak a ni," a ti.

ECI tarlan danin, NGO Coordination Committee-in ECI-a resolution a thehluh chu ECI chuan thuphungin a pawm a, Mizoram dinhmun enfiah turin deputy election commissioner Suddep Jain kaihhruai ECI Team chu Aizawlah a tír leh dawn. ECI team hian November 9-ah Aizawlah NGO Coordination Committee hruaitute an kâwm dawn a; ECI team member dangte chu - Jharkhand CEO Lalbiakthanga Khiangte, ECI secretary SB Joshi leh Mizoram additional CEO Lalzarmawii te an ni.

Election Commission chuan, November 6, Thawhlehni zana Kolasib-a buaina chhuak chu an ngai thutak hle tih a tarlang a, "ECI chuan Mizorama inthlanna muanawm tak awm ṭhin kha kenkawh chhunzawm zel a nih a beisei a, mawhphurhna nei zawng zawngte chu inthlanna ralmuang leh muanawm a awm theih nana ṭan la ṭheuh turin a beisei a ni," a ti. 

Joint NGO resolution

rECI-in April 7, 2014-a ziaka thutiam a lo dah tawh (letter no. 464/MIZ-HP/2014 (B&R) dated 7th. April, 2014)-ah, 'Hun lo la kal tura Lok Sabha leh Legislative Assembly inthlanah Tripura-a cheng Bru-te chu Mizoramah chauh vote an thlak theih nan Commission-in ruahmanna a siam ang,' tih chu tihpuitlin kan phût. Mizoram chhunga vote an thlakna tura ruahmanna siamte kan pawm thei.

rSB Shashank, Mizoram CEO hi a rang thei ang berin Mizoram aṭanga sawn chhuah a, CEO dang dah kan phût. A lakah hian Mizoram inthlan buaipui turin Mizo mipui, Mizoram sorkar hnathawk, kohhran hruaitu, chanchinbumi leh NGO zawng zawngte rinna kan nghat ngam tawh lo a ni.



Share this Post

Login to comment
No Comments