Nov. 9 ral hmaa SB Shashank sawn turin Mizoram sorkar hnathawkte'n ECI an phût

Mizoram sorkar hnathawk pawl hrang hrang inzawmkhawmna, Federation of Mizoram Government Employees & Worker (FMGEW) chuan nimin khan chief election commissioner (CEC) Om Prakash Rawat hnenah lehkha an thawn a; Mizoram CEO SB Shashank chu November 9, Zirtawpni ral hmaa sawn chhuah a nih loh chuan Mizoram sorkar hnathawkte'n an thawhpui tawh dawn loh thu an puang. 

Election Commission of India (ECI)-in Mizo­ram Home secretary Lal­nunmawia Chuaungo a sawn chhuah a sawn chhuak chu vanduaithlak an tih thu leh, ECI hnena thu dik lo report vang a nih thu an ziak a; "ECI hi harsatna a chinfel thuai kan beisei. Mizoram CEO hi November 9, Zirtawpni ral hmaa Mizoram páwna sawn chhuah a nih loh chuan, Mizoram sorkar hnathawkte chuan Elec­tion Commission of India hi kan thawhpui tawh dawn lo a ni," an ti.

FMGEW chuan, Mi­zoram chief electoral officer SB Shashank-a'n Lalnunmawia Chuaungo chungchanga ECI-a report a pek chu thu dik lo a nih thu sawiin, "ECI hian dik lo tak leh hleih nei takin Mizo mipui rilru rina turin thutlukna a siam a, ECI hian a thuneihna a hmang sualah kan ngei. ECI thil tih hian sorkar hnathawkteah nghawng ṭha lo a nei mek a ni," an ti. 

Mizoram CEO-in Mizoram inthlana duty tura central armed police force a chah luh zat (company 40) chu Mizoram mipui zat ngaihtuahin a tam lutuk tih sawiin FMGEW chuan, "Mizoram hi India rama inthlanna thianghlim leh felfai, rálmuang ber a ni reng ṭhin a, hetiang zat zat CAPF chah luh hi thil ṭul lo tawp a ni," an ti a; security duty tur chah luh chungchanga CEO leh ECI thil tih dan chuan Mizoram police-te an rin zawh lohzia tilangtu a nih thu leh, ECI chuan CAPF chah luh zat chu a ennawn a, Mizoram Home department beráwn chunga a tih an beisei thu an tarlang.

FMGEW chuan, CEO leh ECI chet dan chuan inthlan kaihhnawihah Mizoram sorkar hna­thawkte a ring ngam lo tih a lantir tih sawiin, "Mizoram sorkar hi CEO leh ECI hian a ring ngam lo a nih chuan Mizoram sorkar hnathawkte hmang loin official dang zawng mai rawh se," an ti. 



Share this Post

Login to comment
No Comments