Khaw hrangahYMA-in kawngzawh

CADC ṭhiah phûtna kawngzawh hi khaw hrang hrangah neih a ni a, mi ṭha­hnem tak telin, CADC ṭhiah an phûtna thu chi hrang hrang hmangin an au rual.

Champhai khawpuiah chuan hmun pahnih aṭangin kawng zawh niin, Kahrawt kâwn aṭang leh Bethel Veng kâwn aṭangin an zawh ṭan a, Vengthlang kawnah an intâwk khawmin, inkhawm tawi neih a ni. Champhaia kawngzawhah hian mi ṭhahnem tak an tel.

Kolasib-ah chuan hmar lamah Banglakâwn aṭanga zawh ṭanin, chhim lamah Vengthar aṭangin an zawh ṭan a, Diakkawn Square-ah an intâwk khawm. Diakkawnah hian mi hrang hrangin thu an sawi a ni.

Serchhipah chuan Leisekawt Mual aṭanga Serchhip Bazar thleng kawng zawh a ni a, mi 300 chuang an tel. Leisekawt Mualah Serchhip sub-hqrs. YMA vice president Lalzuiliana'n thu a sawi a, Serchhip Bazarah sub-hqrs. YMA president R Sanghmingthanga'n thu a sawi thung.

Saitualah chuan Saitual Group YMA bultumin hmun pahnih aṭangin kawngzawh huaihawt a ni. Saitual aṭanga hmar lam Saitual, Sihfa, Dilkhan, Tualbung, N.Lungher, Buhban leh Thanglailung khaw mite chuan Saitual PWD kâwn aṭangin kawng an zawh a; Keifang, Rulchawm, Ruallung, Mualpheng, Ṭawizo, Maite, Lenchím khaw mite chuan Keifang kâwn aṭangin kawng an zawh thung. Kawng zawhte hi Saitual Civil SDO pisa bul kâwnah an intâwk khawm a ni.

Zobawk Group YMA pawhin pawhin Zobawk khaw chhungah kawngzawh an huaihawt a, sikul naupangte nen khaw mipui ṭhahnem tak an tel. Kawngzawh hi Bangla kâwn aṭanga SBI office kawt thleng neih a ni.

Central YMA chuan thuchhuah siamin, dan loa din Chakma Autonomous District Council (CADC) ṭhiah a nih theih nana kawngzawh huaihawta tel Mizo mipuite chungah an lawm thu an tarlang a; hun lo kal leh zel turah ram leh hnam humhalhna kawnga ṭang ruala hmalak a nih theih nan Mizo mipui thlâwpna CYMA-in a beisei thu an sawi.

CYMA thuchhuah chuan, "Mizo mipui kan inlungrualzia lantir nana Mizoram hmun hrang hranga YMA huaihawta kawngzawhnaa thawk chhuak Mizo zawng zawng chungah thinlung takin CYMA chuan lawm­thu a sawi a. Aizawl khawpui leh khawpui dang hrang hranga kawngzawhna vanga mipui chêt velna lo buai hret leh harsatna tâwkte chungah CYMA chuan hriatthiam­na a dil a ni," a ti. Media hrang hrangte chungah an lawm thu a tarlang bawk.



Share this Post

Login to comment
No Comments