CYMA-in Chakma Council ṭhiah phût Khaw hrang hrangah kawngzawh a ni Kan hnungtawlh dawn lo - CYMA President

Chakma Autonomous District Council (CADC) ṭhiah a nih theihna tura YMA-in hma a lakna kal zelah nimin khan Central YMA-in Aizawl leh khaw hrang hrangah kawngzawh an huaihawt a, mi ṭhahnem tak an tel. 

CYMA president Vanlalruata chuan, CADC ṭhiah a nih theihna atana YMA-in hma a laknaah an hnung tawlh tawh dawn lo tih a sawi.

CADC ṭhiah phûtna kawngzawh hi Aizawlah chuan hmun pahnih - Sikulpuikawn leh Chanmari kâwn aṭanga neih niin, chawhma dar 11-ah ṭan a ni a, Vanapa Hall lam pana kalin, Vanapa Hall kawtah an intâwk khawm a ni. Aizawla kawngzawhah hian Aizawl khawpui chhunga YMA branch awm zawng zawng, branch 104 aṭangin YMA member-te an tel.

CID-te chhût danin, Chanmari kâwn lam aṭanga kawng zawhnaah mi 5,000 chuang an tel a, Sikulpuikawn lam aṭanga kalte chu mi 4,000 chuanga ngaih an ni bawk a; an vaiin mi 9,000-10,000 vela ngaih an ni. Kawng tluanin dan loa din CADC ṭhian an duh thu te, Chakma foreigner-te chu Bangladesh-ah haw tura an duh thute leh thil chi hrang hrang hmangin an au rual.

Chanmari kâwn lam aṭanga kawngzawhah hian MZP president L Ramdinliana Renthlei-in thu a sawi a; Sikulpuikawn aṭanga kawngzawhah MSU president RB Lalmalsawma'n thu a sawi thung.

Kawngzawh zawhah Central YMA hruaitute chuan Governor Kummanam Rajasekharan hnenah sorkar laipuia thlen tur memorandum an thehlut. Memorandum-ah hian CADC chu dan loa din a nih thu te, Mizo mipuiin ṭhiah an duh thu te, Mizorama awm mek Chakma zingah foreigner an tam thute an tarlang a ni.

CYMA general secretary Lalhma-chhuana sawi danin, kawngzawh hi YMA sub-headquarters dinna khawpui panga - Lunglei, Champhai, Kolasib, Serchhip leh Mamitahte neih a ni a; YMA branch pathum, joint YMA pahnih leh group pasarihte'n an huam chhungah kawngzawh an huaihawt bawk.

Vanapa Hall kawta thu sawitu Vanlalruata, CYMA president chuan CADC ṭhiah a nih theih nan theihtawp an chhuah zel tih sawiin, "Ná ka tih em em chu, Mizoram map kan en a, kan map chhunga awm Chakma area-ah Mizote'n mimal in tur chu thu hran, biak-in hmun kan nei thei ta lo hi chu a ná a ni. He CADC hi a rang lama ṭhiah a nih theih nan kan bawhzui zel ang a, vawiina Mizo mipuite'n kan lungrualzia kan lantir hian thui takin tunah min kalpui tawh a ni," a ti.

CADC chu dan loa din a nih avangin dan anga ṭhiah a nih theih nan an nawr zui zel dawn tih sawiin Vanlalruata chuan, "Parliament ṭhiah tur a ni teh meuh mai, kan hria. Ama'rawhchu, Court-ahte pawh kan kal ang a, hma kan la chho ang a, hun rei a duh mai thei. Mahse, kan hnungtawlh tawh lo ang," a ti a; CADC a pian aṭanga kum 46 a ral hnuah kawng zawh chauh chu tlai deuhin lang mah se, awmzia a neih ngei an rin thu a sawi.

CYMA President chuan, Central sorkar leh Mizoram sorkarte chu harh se a duh thu sawiin, "India sorkar pawhin lo hria se, kan thlan chauh a tlak lai hian min ngaihtuahpui rawh se; thil dang a tel hma hian India sorkar laipui leh kan sorkarte pawh hian lo hria se... Tunah hian kan thlan chauh a la far, hei bak hi chu thil dang a far zel lohna turin Mizoram sorkar a ni emaw, Central sorkar a ni emaw hian khawngaihin kan thusawite hi lo chhinchhiah rawh se," a ti.

CADC ṭhiah a nih theih nana YMA hmalak dan sawiin Vanlalruata chuan, Parliament House library leh Mizoram Assembly library-ahte an kal a, document an dap kual tih a sawi a, "Kan dan hremi te, mithiam hmasate kan ráwn kual. He hna hi a awlsam lo," a ti a; mahni in chhung leh tapchhak záwla phunin awmzia a nei lo a, a taka che chhuak turin YMA-in hma a la ta tih a sawi.

CADC chu dan loa din a nihna chungchangah zawhna tam hle mai se, Court-ahte kal an tum avangin an ṭanfung turte vantlang hriata sawi chhuah vek a rem loh thu Vanlalruata chuan a sawi a, "Mak tak maiin, dan kha an duh duhin an her rem a, CADC pian theihna turin ni 28 lek nungin regional council-te an din a ni. Mizote'n kan hriat ve hauh lohin Chakma Regional Council chu a taka ding hman loin CADC-ah an kaisantir zung zung a, ni 28 chhung lekin. Khawvelah promotion hmu chak ber an ni mai awm e," a ti.

Vanlalruata chuan, Chakma-te chu Mizote dinhmun chuhpuitu an nih thu sawiin, "Ramri lam ni se, a âwng huau emaw tih tur a ni a, a duh duh an rawn lut a, an rawn kal a, an zalen em em a; khawiah nge i kal dawn, titu pawh an nei lo," a ti a; ramri vengtute'n Mizoramah dan loa foreigner lut an awm loh thu sorkar laipuiah an thlen reng a, a takah erawh chuan Chakma-te chu an pung chak hle si tih a sawi.

CYMA President chuan, kawng zawhnaa tel zawng zawngte chungah lawmthu a sawi a, "Vawiina Mizote kan inlungrualna kan lantir hi a ropui a, hei hi a tawpna a ni lo turah ngai ila. Mizo mipuite theihtawp chhuahin kan ṭangrual zel dawn lo'm ni?" tiin Mizo mipuite ṭang zel turin a sáwm a ni.



Share this Post

Login to comment
No Comments