Education Minister-in in pahnih a hawng

SCERT Multipurpose building leh DIET Hostel building tharte chu September 12, Nilaini khan School Education minister H Rohluna’n a hawng a; Minister chuan, "Zirna hmasawnna ruhrel dinnaah hma kan la nasa a, zirna quality pawh a sang chho ve zel a ni," a ti.

H Rohluna chuan, zirna lamah hmasawnna ruhrel dinin hma an la nasat thu sawiin, "Sorkar laipui leh NEDP aṭanga sum hmuh hmangin Aizawlah Education Centre sak mek a ni," a ti a; district hrang hrangah DIET building thar hawn a nih thu a sawi.

Hnam dinchhuahna atan zirnaah hmasawn a ngai tih sawiin H Rohluna chuan, "Zirtirtute an nihna tur ang taka chherchhuah hi kan tih tur a ni a, kan rama zirna ṭha kan neih theih nan zirtirtute'n mawhphurhna lian tak an nei. Zirlaite'n an mamawh anga kaihhruai theih nan rilru nei takin training hun hman a ngai a ni," a ti.

School Education Minister chuan, zirtirtute tan training a pawimawh telh telh dawn tih sawiin, "Nakum aṭang chuan zirtirtute'n training an paltlang ngei tura kalpui beisei a ni a, hei hian sorkar leh mimal sikul a huam," a ti a; Mizoram state budget-ah zirna atan sum tam tham tak dah a nia sawiin, "Hemi hmang hian ṭhalai chhawrtlak leh hmantlak chher chhuah bakah, zirna lama nasa taka hmasawn tum a ni a, hemi atan hian department aṭangin hma kan la nasa a, heng hmalaknate hlawhtlin nan hian zirtirtute an pawimawh hle a ni," a ti bawk.

SCERT Multipurpose building hi cheng nuai 175.68 senga sak a ni a, March 22, 2016-ah sak ṭan niin, January 31, 2018-ah sak zawh a ni. DIET Hostel chu cheng nuai 198.49 sénga sak a ni a, January 15, 2016-ah sak ṭan niin, January 6, 2017-ah sak zawh a ni.

Building pahnih hawnna inkhawm hi School Education secretary Esther Lalruatkimi’n a kaihruai a, SCERT director Laldawngliani Chawngthu-in lawmna thu sawina hun a hmang.



Share this Post

Login to comment
No Comments