Mizoram páwna sipaite'n inthlanah online kaltlangin vote thlak thei dawn

Kumina Mizoram Assembly inthlanpui neih turah Election Commission of India (ECI) duh dan angin electronically transmitted postal ballot system (ETPBS) hman a ni dawn a, Mizorama an hman vawi khatna tur a ni.

ETPBS hi service voter (armed forces), Mizo­ram páwna awmte tan ralkhat aṭanga vote an thlak theihna tura a ruahman a ni a; hmun kilkhâwr leh ramri depa awm sipaite vote thlak huna Mizoram haw thei lote'n an awmna aṭanga vote an thlak theihna tura a ruahman a ni.

Sorkar thuchhuah tarlan danin, sipai hmun­puiah an record officer ṭheuh­te'n service voter roll an kawl ang a, chu chu DEO/DC office nen online hmanga inzawmin, username leh password login hran an nei ṭheuh ang. Record officer-te pawh chutiang bawkin, mi dangin an login sak thei lo.

Inthlana candidate-te inhnuhdawh theih hun hnuhnung aṭangin ni riat hmain candidate turte hming a chian veleh Mizoram chhunga returning officer-te'n postal ballot chu online-in an thawn ang a, sipaite hmunpuia record officer-te'n lo print in, sipaite hnenah an sem ang. Sipaite chuan an duhna zâwnah an thai (vote an thlak) ang a, chu chu envelope uluk taka siamah thunin, dâk (post) hmangin an awmna biala returning officer, Mizoramah thawn lêt tur a ni a; vote chhiar ni hma ngeiin a awmna returning officer office a thleng tur a ni. 



Share this Post

Login to comment
No Comments