Sikul 61-ah No teaching Day hmang ṭan

Mizoram Government Aided School Association (MIGASA)-in lumpsum grant-in-aid high school leh middle school-te adhoc grant-in-aid dinhmuna dah tura Mizoram sorkar an ngennaah thu lawmawm an hmuh loh avangin nimin aṭang khan 'No Teaching Day' an hmang ṭan.

MIGASA-in No Teaching Day an hman avangin lumpsum aided H/S leh M/S 61-ah zirlaite leh zirtirtute sikul kai mah se, zirlai an zir thei lo a; No Teaching Day hi August 17, 2018 thleng hman phawt tur a ni. No Teaching Day chhunga sorkar aṭanga thu lawmawm an dawn loh chuan an hmalak zel dan tur an ngaihtuah leh dawn tih sawiin, "Assembly-in a lo rèl lâwk tawh angin, sikul khâr thlengin rua­hmanna siam a ni," an ti.

Nimina MIGASA thuchhuah chuan, Mizoram union territory a nih lai aṭangin sorkarin a tahtawl­in kum nga danah sikul a upgrade ṭhin tih sawiin, "Tuna Congress sorkar hian kum 10 dáwn an sorkar tawh chhung hian Kolasib-a CZS HSS tih loh chu upgrade an la nei lo," an ti a; an sikulte chu adhoc grant-in-aid-ah hlângkai ngei turin Mizoram sorkar an ngen nawn leh tih an sawi.

MIGASA chuan, sorkarin tuna lumpsum-a awm mekte khawih che loin, purely private school eng emaw zat lumpsum-a dah thar a tum nia an hriat thu an sawi a, "Kum 20 dáwn ding tawh, lumpsum-a kum 10 awm tawhte leh kum hnih/khat chauh la ding private sikulte dinhmun inanga hrût rual a tum hi a ná kan ti a ni," an ti.

MIGASA tarlan danin, lumpsum grant-in-aid-ah hian H/S 27 leh M/S 34 an awm a, heng sikul 61-ah hian zirlai 3,000 chuang an awm. Lumpsum school-te hi lumpsum dinhmuna dah an nih tirh, kum 2008  aṭanga tun thlengin kum tin Mizoram sorkar­in ṭanpuina Rs. 1,20,000 a pe ṭhin.

Lumpsum-a hlankai an nih tirah ṭanpuina an dawn zat, kum khata Rs. 1,20,000 chu tunah chuan a beitham tawh hle tih sawiin MIGASA chuan, "Kum 10 chhunga tihpun leh ennawn awm miah lo kan grant dawn mek hi Rs. 1,00,000 pawh tling mang loa min tihpunsak ve hret an tum chauh niin kan hria a, khawtlang mipuiin kum 20 an lo hahpui tawhna a chhâwk pha lo hle a ni," an ti.



Share this Post

Login to comment
No Comments