Solar power MW 100 dinna tur DPR Chief Minister hnenah hlan

Mizorama ni zung chakna hmanga kawlphetha megawatt 100 siamna tur, Solar Power Plant detailed project report (DPR) chu tun hnai khan a siam hna thawktu tur Sungevity Enterprises hotute'n chief minis­ter Lal Thanhawla'n hnenah Nilaini khan an hlan.

He project hi Mizoram sorkar leh Innovation India bultuma Magnetic Mizoram Investors Summit buatsaihin a rah chhuah a ni.

Sungevity Enterprises hotute nen CM Banglaa an inkawmnaah Chief Minister chuan, Magnetic Mizoram avangin national leh multinational company tam takin sumdawnna hmun atan Mizo­ram an thlithlai mek tih sawiin, "Company hrang hrangte hian Mizoram hmasawnna atan thâ thawh ve an duh a ni. Sungevity Enterprises-te'n solar power plant an bun tur pawh hi Mizoram hmasawnna atana kawng pawi­mawh tak a ni ang," a ti. 

Sungevity Enterprises hotute hian Governor Kummanam Rajasekharan pawh Raj Bhavan-ah an kâwm a, solar power plant an siam tur chungchang an hrilhfiah. 

Governor leh Chief Minister an kawm ṭuma Sungevity Enterprises hotute ṭawiawmtu, Innovation India CEO Capt. Rahul Bali chuan, Magnetic Mizoram chuan hlawhtlinna duhawm tak a hmuh thu a sawi a, "Sungevity Enterprises-te'n Mizorama hna an thawk ṭan tur hi Mizorama investment luh bul ṭanna hun duhawm tak a ni," a ti. 

Sungevity Enterprises hian megawatt 100 siam chhuak thei tur solar power plant hi cheng vbc. 630 sêngin an siam dawn a ni. 



Share this Post

Login to comment
No Comments