Mizoram quota-a medical course zir tur Thlanna dan High Court-in a 'stay' nawn

Gauhati High Court chuan, The Mizoram (Selection of Candidates for Higher Technical Courses) Rules, 2016 chu hman rih loh turin a dah (stay) nawn leh. Hei vang hian Higher & Technical Education (HTE) department-a Technical Wing-in medical course hrang hrang zir tur thlanna atana counseling an neih chu nimin khan tihtawp lailâwk nghal a ni.

MSCU hminga Jagadish Chakma-in The Mizoram (Selection of Candidates for Higher Technical Courses) Rules, 2016 chungchanga petition a thehluh chu Gauhati High Court chief justice Ajit Singh leh judge Achintya Malla Bujor Barua-te ṭhutna Bench-in a ngaihtuah a; August 8, Nilaini khan an thupek a tichhuak a ni.

Gauhati High Court order-a a lan danin, High Court hian June 24, 2016-a order a lo chhuah tawh, The Mizoram (Selection of Candidates for Higher Technical Courses) Rules, 2016 hman rih loh tura dahna chu tihnun leh a ni a; mahse, High Court order hi judgement order a la ni lo a, September 2018-ah hearing neih leh a ni ang.

High Court-in stay order a tihnun leh tâk avang hian HTE Technical Wing-in medical course hrang hrang a kalpui mek chu nimin khan chawlhsan nghal a ni. Hemi chungchangah hian Technical Wing hotute chuan, counselling an la zawh loh thu leh MIMER-a lut tur pawh tihfel kim a la nih loh thu an sawi. 

HTE Technical Wing hotute chuan, High Court order hian counseling tih tawh leh chumi hmanga medical course zir tur thlan tawhte chu a nghawng lo tih an sawi a, "Chakma-te chu Category-II ah an awm avangin counseling tih tawh chinah Chakma zirlaite koh an la ni lo," an ti.

HTE department chuan kum 2015 khan The Mizoram (Selection of Candidates for Higher Technical Courses) (Sixth Amendment) Rules, 2015 a tichhuak a; chu chu MCSU-te'n duh loin, Gauhati High Court-ah an khing. Mahse, Mizoram sorkarin Rules chu July 16, 2015-ah a hnûkkîr a, Chakma-te chu Category-I ah a dah avangin High Court pawhin PIL chu a titawp a ni.

HTE department-in April 20, 2016-ah Mizoram (Selection of Candidates for Higher Technical Courses) Rules, 2016 a tichhuak leh a, Chakma-te chu Category-I aṭangin Category-II ah dah an ni. Hei vang hian MCSU chuan Gauhati High Court-ah PIL an thehlut leh a, MSCU petition thehluh hi June 24, 2016-ah Gauhati High Court chuan ngaihtuahin, Court-in a chinfel hma chuan hmang rih lo turin Mizoram sorkar a hriattir (a stay) a ni. 

April 20, 2016-a Rules tihchhuahah chuan, Category-I ah Mizorama Zo hnahthlakte (Zo-ethnic)-te dah niin, an tan seat 95% zuah a ni a, Category-II ah Mizorama chêng nghet Zo hnahthlak ni lote dah niin, an tan seat 4% zuah a ni. Seat 1% chu Mizorama cheng si, awm nghet lote (Central sorkara thawk fate) tan dah a ni thung.

Gauhati High Court chuan, May 2, 2018 khan order tichuakin, MCSU-in PIL an thehluh vanga The Mizoram (Selection of Candidates for Higher Technical Courses) Rules, 2016 hman theih hrih lo tura a dah (stay)-na chu a titawp. Court-in a hmaa stay order awm tawh a tihtawp chhan chu - thubuai ngaihtuahnaah MCSU-te ukilte inlan tura koh an nih ṭhin pawha a inlan ngai loh vang a ni. Hei vang hian The Mizoram (Selection of Candidates for Higher Technical Courses) Rules, 2016 chu hman zui theih a ni.

National Eligibility & Entrance Test (NEET) kaltlanga Mizoram quota-a MBBS leh BDS zir tur thlannaa Category-I ah Chakma zirlai paruk leh vai pakhat an awm avangin MZP-te chuan July 19, 2017 khan HTE department-a Technical Wing pisaah MBBS leh BDS counselling neih tur an dang tawh. A hnua MZP-te'n lungawi lohna an lantirna kal zelah Mizoram sorkarin councelling-ah Chakma zirlaite a koh zui loh avangin buaina a chhuak zui lo a, Mizo zirlaite chauh Mizoramah quota-a MBBS leh BDS zir tura tirh an ni. 



Share this Post

Login to comment
No Comments