Turini lei July-ah dawh zawh tum

PWD chuan thuchhuah siamin, Sesawng leh Khawruhlian inkara Tuirini lei (bailey bridge) dawh hna thawh mek a nih thu an tarlang a, "July 2018 chhunga dawh zawh hman tumin theihtawp chhuah mek a ni," an ti.

PWD tarlan danin, lei hmasa dawh mek laia February 13, 2018-a chim ta kha ft. 200-a sei a ni a, tuna an dawh thar chu ft. 160-ah a dona ban (RCC pier) phunin, a vaia sei zawng chu ft. 210 a ni dawn. A dona ban phun zawh a nih hnuah chauh Sesawng lama lei dotu (abutment) thawh ṭan theih a nih bakah, RCC pier hna thawktuin harsatna hrang hrang an tawh avang leh, abutment hna thawktuin beisei anga a thawh chak loh avangin July 3, 2018-ah a dona siam hna zawh chauh a ni.

July  4, 2018 aṭangin lui kam Sesawng lamah lei hmanrua chu ft. 100 vel rem khawm hna thawkin, July 7 aṭangin lui lama nawr tawlh hna ṭan a ni. Khawruhlian lam lui kamah thir lei lo hnûk tur khawl dah a ni a, ṭum khatah a nih dan tur ang a bang (panel) inthuah (double-double) nawr kai loin, a mal (single) nawr tawlh hnuah a bang thuah (double-single) in a zui ang. Chumi hnuah a bang (panel) thuah leh chherchhuan (double-double)-in a zui ve leh dawn a ni. 

Tum anga hna an thawh tluan theih chuan, July 21, 2018-ah lei tur nawr kai hna an thawk zo ang a, a chhuat phah leh a sir tawn tawna làwnna (approach road) siam ṭhat leh nen July thla tawpah chuan dawh zawh hman tumin theihtawp an chhuah zel a ni.



Share this Post

Login to comment
No Comments