Pathian thu sawi lai kutthlak a ni

July 9, Thawhṭanni zan dar 9 vel khan Kulikawnah Pathian thu sawia kal kual ṭhin K Remsangpuia (20) chu an veng Kulikawn SP Road-a thu a sawi laiin thu a sawina bula chêng H Lalsiamliana (50 vel), PHE department-a executive engineer chuan kut a thlak a; H Lalsiamliana hi police-in an man nghal.

Kulikawn Police Station leh Aizawl Police Station-a mite sawi danin, H Lalsiamliana'n Remsangpuia kut a thlak avang hian Kulikawn mipui eng emaw zat chu an pung khawm a, Pathian thusawi lai kut thlaktu demin an au rual a ni. H Lalsiamliana te inah hian police thleng thuai mah se, mipui pungkhawm avangin police station lamah an hruai nghal mai thei lo a, zanlai pelh hnu, zing dar 2 velah hruai chhuakin, Aizawl PS-ah an la a ni.

Remsangpuia hi nâk, a kiu veilamleh a dàr veilam a vúng a, damdawi-inah hruai a ni a; mahse, a ruh chhia a awm lo a, first aid pek hnuah an inah hruai haw a ni. Thawhṭanni zan vek khan Remsangpuia nau F Lalrinchhana'n Kulikawn PS-ah FIR a theh­lut nghal a; 295A/324/341/341 IPC R/W 43 (A) MLPC Act hmangin thubuai ziah luh a ni.

He thil thleng chungchangah hian Remsangpuia awmna Kulikawn West Welfare chuan nimin khan Kulikawn Local Council (LC) Chairman hnenah thil thleng sawifiahna leh hma la tura ngenna a thlen a, "Tunah hian Police case kalpui mek tawh a ni a, a ṭul angin Kulikawn West khawtlang chuan bawhzui zel kan tum a ni," a ti.

Kulikawn West Welfare tarlan danin, Remsangpuia (20) hian zan dar 9 velah Pa­thian thu sawiin, hnehna puangin a au a, chu chu H Lalsiamliana'n a lo chàngin, tiangin a vua a ni. Remsangpuia hian Kulikawn hmun ṭhenkhatah vawi tam tak Pathian thu a aupui tawh ṭhin a, khawtlang tana ninawm khawp a nih an hre ngai lo. H Lalsiamliana erawh chuan bengchheng tiin a lo khap tawh ṭhin a, kut a lo thlak tawh bakah, au tawh lo turin a vau tawh a; kut a thlak hmasak ṭum hian Remsangpuia'n ngaihdam a dil zawk a ni.

July ni 10, 2018 (Thawhlehni) zingah Kulikawn West Welfare aiawhte chuan Kulikawn PS-ah thil awmdan bawhzuiin Officer Incharge an hmu a. Case No 85/18 hnuaiah thubuai 295A/324/341/341 IPC R/W 43 (A) MLPC Act ziahluh a ni tih kan hria a. Police lamin theihtawp chhuah an tum tih kan hriat rual hian Court-in dan ang taka ro a rel kan phut tlat a. Khawtlang chuan a tul angin kan bawhzui zel kan tum a ni.

Kulikawn West Welfare tarlante

1.PHE Engineer hi zan lamah ṭhenawm khawveng rîkrâp zawngin vawi tam a khawsa tawh ṭhin a. A in aṭanga silai a hmeh puah fo avangin a bul vela chengte thlabárin an awm fo tawh.

2.Kumin January thlaah pawh silai a hmeh puah vak avangin Kulikawn khawtlang hruaitute hmalaknain Kulikawn PS-ah complain thlen a ni a, hemi zan hian lock-up niin, a tuk zingah chhuahtir lehnghal a ni.

3.Khawlaia Pathian thu sawi leh aupui 

ṭhenkhatte pawh ngaithei loin a lo vau fo tawh ṭhin. Ṭhenawma damlo ṭawngṭaite thlengin a ngaithei lo bawk ṭhin a, silaia kah darh vekahte a lo vau tawh.

4.Ṭhenawm naupangte birthday lawm thâwm pawh a ngaihtheih loh ṭhin bakah, ṭhenawm naupangte chu World Cup football en turin hmun dangah a kal chhuah phah hial tawh.

5.Mi kawng kal kut thlak leh vau a chîn thu sawi tur a awm nual.

6.Tun ṭuma thil thlengah hian kut tuartu Lal­remsanga hian a tawng vanduai niin kan hria a, kan lainatin kan khawngaih hle. He thil thleng leh a hma aṭanga boruak lo inmung tawh sa avangin khaw­tlang mipuite chuan dan ang taka rorelna kalpui ni se kan ti a ni.



Share this Post

Login to comment
No Comments