Eirûkna vangin hmasawnna a ṭhuanawp - ZPM CM Candidate

Ṭangrual pawl, Zoram Peoples' Movement (ZPM) Southern headquarters chuan nimin khan Hausiampa Hall, Haulawngah Lunglei North Constituency Workers Meet an buatsaih a; ZPM chief ministerial candiate Lalduhoma'n thu sawiin, Mizoramah eirûkna avangin hmasawnna tur a ṭhuanawp nasa tih a sawi.

Lalduhoma chuan, Mizorama sorkar ding tawhte'n kut hnathawktute tan budget-ah sum an dah ngai lo tih sawiin, "Kut hnathawktute buh thar chhuahte erawh an sorkar tihhmingṭhat nan an report-ah an ziak lang 

ṭhin. Keini chuan kut hnathawktute tan budget-ah sum kan dah dawn. Khaw tinah development bank kan din ang a, chhungkaw tin hnenah bul an ṭanna tur loan kan pe ang," a ti.

ZPM CM Candidate chuan, kut hnathawktute leh mirethei zawkte zalenna rahbehsak a, sala siamna sem policy ang chu ZPM-in an tih ve dawn loh thu sawiin, "Kan 'Bána kaih policy' hmangin kut hnathawktute leh miretheite tan sal táng chhuahna jubilee dar kan vuaksak dawn. Thuneihna sem zai kan ngai pawimawh dawn a, Panchayati Raj hi kan hnam leh ram mila siamremin kan introduce dawn a ni," a ti a; kohhrante duh dan angin fa nei tam lawmman an siam dawn thu a sawi.

ZPM vice chairman Rev. K Thanzauva pawhin thu sawiin, Mizoram chu Pathian hnam thlan leh zawn chhuah ram a nih thu a sawi a, "Chanchin Ṭha avangin kan ram hi khawvelin Kristian ram tia an hriat kan nih bakah, vawiin kan thlen theihna chhan a ni. Mahse, kan ram rorelna min kaihruai tawhtute'n min kalpui dan a dik tâwk loh avangin vawiinah chuan kan ram chu HIV/AIDS vei tamna ram, drugs addict tamna ram, smugglers tamna ram, eirûkna ram, chanhai leh pachhiate laksakna ram, cancer vei tamna ram kan nih tawh a ni," a ti.



Share this Post

Login to comment
No Comments