Aizawl Civil Hospital-a khawl thar chi hrang hrang minister pahnihin an hawng

Aizawl Civil Hospital (ACH) thuam ṭhatna tura khawl leh hmanraw hrang hrang, Mizoram sorkar policy NEDP aṭanga sum hmuh hmanga leite chu nimin khan Finance minister Lalsawta leh Health minister Lal Thanzara ten an hawng. Hmanraw hrang hrang lei tharte chu Rs. 3,95,41,595 man a ni.

Finance minister Lalsawta chuan, NEDP chu hmasawnna huapzo ruahmanna, thlûr bik nei loa mipui mamawhna kawng hrang hrangah hman a nih thu sawiin, ACH tana khawl ṭha leh man to tak tak NEDP sum hmanga leite hi mipui rawngbawlna atana hman tur a ni. Health sector hi mipui mamawhna a nasat avangin sorkarin a ngai pawimawh leh zual a, theihtawp chhuahin a tihchangtlun hna sorkarin a thawk zel dawn a ni," a ti. 

Health minister Lal Thanzara chuan, NEDP aṭangin ACH leh State referral Hospital bakah, Mizoram sorkar damdawi-inte mamawh hrang hrangte mamawh khawl leh hmanraw hrang hrang lei a ni chu lawmawm a tih thu a sawi a, "Khawl ṭha tak tak kan neih tharte avang hian phai lama inenkawl tura damlo thawn a tlem phah a, sorkar sum sen a tlakhniam phah dawn a ni," tiin, khawl tharte chu doctor-te'n a ṭangkai thei ang bera an hman a beisei thu a sawi.

Lal Thanzara chuan, Mizoram sorkara thawk doctor zinga tam tak chu private clinic nei leh private hospital-a thawk tel an nih thu sawiin, Private clinic hi mi tam zawk ban phâk loh a nih avangin, tuna kan khawl tharte hi mi retheite'n an chhawr ṭangkai turin a nihna ang taka hmang turin ka chah duh che u a ni," a ti.

ACH medical superintendent Dr KL Remsanga sawi danin, ACH-a hmanrua leh bungraw lei thar nimina hâwn takte hi a chi hrang 33 a ni a, tam tak chu hman mek a nih tawh laiin, la thlen belh tur a awm nual.

ACH deputy medical superintendent Dr John Zohmingthanga chuan, ACH chu khum 300 awma chhàl ṭhin ni mah se, tunah chuan khum 270 vel a awm thu a sawi a; damdawi lama inkaihhruaina ang chuan nurse 224 awm tur a nih laiin, tun dinhmunah staff nurse 108 chiah an awm thu sawiin, staff nurse 108 bakah NHM aṭangin nurse 60 vel an awm avangin an la kal hram hram thei zel rih tih a sawi bawk. 

Aizawl Civil Hospital hotute chuan, khawl thar ṭha tak tak an neih thar avangin tun hmaa an la tih theih ngai lohte an ti thei tih sawiin, "Phai lama kan in refer ṭhin chhan tam tak tuna khawl thar kan neihte hmangin kan ti thei tawh a, cancer tih loh natna dang zawngah chuan phai lama inenkawl tura refer zat a tlem phah hle a ni," an ti.

ACH hotute hian an damdawi-in mamawh hrang hrang la awmte minister pahnih hnenah hian an thlen nghal a; an thlen zinga pakhat, Aizawl leh district hrang hranga damdawi-inte'n ambulance ṭha an mamawh thu an sawi chungchangah Finance Minister chuan, chiang zawkin ziaka thlen turin a ràwn a, sum dinhmun en chunga an ngaihtuah tur thu a sawi.



Share this Post

Login to comment
No Comments