SHC interim sorkar siamfel a ni CEM hmasa ber tur Lalṭhalien

Mizoram sorkar leh Hmar Peoples' Convention (Democrat) inremna anga Sinlung Hills Council (SHC) din a nih hnuah, interim sorkar dinfel a ni a, chief executive member (CEM) atan Lalṭhalien ruat a ni. 

Home additional secretary Lalbiak­zama chuan July 9, Thawhṭanni khan notification tichhuakin, SHC sorkar lailâwk (interim) din a nih thu hi a tarlang. Interim sorkar hi thla ruk chhung atan a ni a, notification chhuah aṭanga ni 30 chhungin Aizawl DC kaihhruaina hnuaiah sitting (session) nei tura tih niin, session neih hunah SHC member-te lak luh an ni ang. 

Assembly Session hnuhnung bera pass tâk, 'The Sinlung Hills Council Bill, 2018' angin SHC-ah hian CEM pakhat, chairman pakhat, deputy chairman pakhat, executive member (EM) pali leh member panga ruat an ni a, nominated member pahnih erawh ruat an la ni lo.

Vanglaini palai zawhna chhangin CEM Lalṭhalien chuan, a rang thei ang bera session neih an duh thu a sawi a, "July 13, 2018 chawhma dar 10 hian Aizawl DC pisaah rinawmna thutiama lak luh kan ni ang," a ti a; nominated member pahnih pawh ruat an ni tawha a rin thu a sawi.

CEM Lalṭhalien hi HPC(D) leh Mizoram sorkarin inremna tura inbiakna an neih ṭuma HPC(D) aiawh zinga an thupuangtu a ni a, chairman atana ruat LT Hmar chu inbiakna neih ṭuma HPC(D) aiawhte chairman a ni thung. 

HPC(D) an inpek hmaa deputy army chief Lalbiekung chu SHC-ah deputy chairman a ni dawn a, general secretary Darliensun Ralsun leh cadre JC Zairemkunga te chu EM an ni ang. 

SHC intermin sorkar term thla ruk a zawh hmain emaw, a hnuah emaw inthlan buatsaih a ni dawn a, chuta thlan tlinte chuan SHC an enkawl chhunzawm dawn a ni. 

SHC nih phung tur tlangpui

ØMizoram sorkarin SHC area tana village coun­cil area hrang hranga bi­thliah tur huam chhung­ah SHC a din ang. 

ØSHC chuan General Coun­cil leh Executive Council a nei ang.

ØGeneral Council-ah mem­ber 14 awmin, chung zinga member 12 chu mipui thlan tur a ni a, member pahnih chu Council ráwn chung­in sorkarin a ruat ang. Member 12 thlante 

aṭangin chairman, de­puty chairman leh CEM thlan a ni ang. 

ØCEM-in member dangte aṭangin EM pali a ruat ang.

ØGeneral Council term chu kum 5 atana ruahman a ni.

ØCEM, EM leh Council member-te hlawh leh hamṭhatna dawn tur chu dan tesêp (Rules) hmangin sorkarin a la siam ang.

ØSorkarin Sakawrdai emaw, Council area chhunga hmun dang emaw Council headquarters atan a la puang ang.

ØGeneral Council-te chu thla li chhungin vawi khat tal an ṭhukhawm ṭhin tur a ni.

ØSHC headquarters-ah Secretariat a awm ang a, secretary leh officer dangte'n an vil ang.

ØGeneral Council hian SHC huam chhunga hmasawnna hnathawhna lamah thuneihna zau tak an nei ang a, ram inpekna kalpui chungchangah Site Allotment Advisory Board (SAAB) angin hna an thawk ang.

ØGeneral Council hian village council-te'n chhiah/fee khawn theihna an neihnaah sorkarin a bithliah angin fee/chhiah a la ve thei dawn.

ØGeneral Council atana election kalpui dan tur Rules sorkarin a duang dawn.

ØCouncil tan sum báwm hran ruahman a ni a, chutah chuan state sorkar leh hmun dang aṭanga sum dawnte dah luh tur niin, Council inrelbawlna kaihhnawih leh a huam chhunga hmasawnna ruhrel dinna atante sum pek chhuah ṭhin tur a ni.

ØGeneral Council hian anmahni inrelbawlna leh hmalakna turin kum tin budget a siam ang a, sorkar pawmpui turin an thawn ṭhin ang.

ØSakhuana thil leh khawtlang nunphung bakah, hnam dan leh hrai khawih thei thil dang siam a nih dawnin state sorkarin General Council a rawn ṭhin ang.

ØGeneral Council din a nih hma chuan sorkarin a theih anga hmain interim executive council din turin executive member lailâwk turte a ruat dawn.

ØMizoram electoral roll-a hming chuang kum 18 tling chinte'n SHC inthlan an chuh thei ang



Share this Post

Login to comment
No Comments