Home Guard-a Director General post siam Duh loin sipai hluite'n kawng an zawh dawn

Mizoram Ex-Service League (MESL) hruaitute chuan, Mizoram Home Guard (MRHG)-ah Mizoram Police Service (MPS)-te chauh chelh theih tur Director General post thar siam tumin hma a la chhunzawm zel nia an hriat thu leh chu chu an duh loh thu an sawi a; DG post siam an duh lohzia lantir nan naktuk June 14 hian Aizawlah ex-servicemen ten kawng an zawh dawn tih an puang.

MESL hruaitute hian nimin khan Aizawl Press Club-ah thuthar thehdarhtute an kâwm a; an president Col. John Zama chuan, Mizoram Cabinet-in MRHG-a DG post siam turin August 27, 2014-ah thutlukna an siam tih sawiin, "MESL leh Mizoram Home Guard Service Association (MRHGSA)-te diriam leh hnuaichhiahna a ni a, MPS-te hleihluak taka duhsakna a ni," a ti.

MESL hruaitute sawi danin, Mizoram sorkarin kum 2014-a MRHG-a DG post a siam chu Mizoram Home Guards Act, 1985 kalh a nih avangin MRHGSA-in Gauhati High Court-ah an khing a; Gauhati High Court Aizawl Bench chuan 'Commandant general aia thuneihna sang zawk nei post hi state sorkarin a siam thei lo,' tiin Mizoram sorkarin DG post a siam chu a ṭhiahsak a ni.

High Court-in thutlukna a siam hnu thla hnih pawh a liam hmain Mizoram sorkarin MRHG-ah MPS tan bik chauha chelh theih tur DG post siam a nih theih nan Mizoram Home Guards Act, 1985 chu tihdanglam a tum mek nia an hriat thu an sawi a, "MESL-te chanvo chhuhsakna a nih bakah, tuna a awm ang hian ṭha takin a kal thei reng a, DG post siam hiṭul loa sum tam tak sen belhna tur a ni," an ti.

MESL hruaitute chuan, Minis­try of Home Affairs-in state level-a Home Guards organisation hotu lu ber chu Commandant General a ni ang, a tih thu leh, India ram puma a hotu ber chu Director General tih a ni ang, a tih thu an sawi a; MHA vekin Home Guards leh Civil Defence te kaihkawp a nih chuan a hotu lu ber chu Commandant General cum Director Civil Defence tih a ni ang, a tih thu an sawi bawk.

MRHG chu police battalion khat ai pawhin an tlem zawk tih sawiin, "Police battalion pakhatin DG post an mamawh loh laiin, an aia tlem  zawk daih MRHG-a DG post siam a tum tlat hi thil dik lo a awm a ni. Home Guards & Civil Defence enkawl tur hian Commandant General a tawk em em a ni," an ti.

MRHG hotu ber tura MPS tan bika DG post siam an duh lohzia lantir nan MESL chuan June 14 hian Aizawlah kawng an zawh dawn a; sipai bangte leh an nupuite'n Zarkawt kawn aṭanga Vanapa Hall kawt thleng kawng an zawh dawn a ni.

MESL hruaitute sawi danin, MRHG hi kum 1964-ah sipai pension mi 10-in an din a ni a, a hotu ber Commandant General chu sipai officer pension tawhte leh IPS-te an ni ṭhin. Tun dinhmunah MRHG-ah hian mi 1,040 an awm a ni.

MESL hruaitute chuan, sorkar laipuiin kum 1979-a dan a siamah sipai bángte tan sorkar hnaah group C-ah 10% leh group D-ah 20% hauhsak (reserve) tura tih a nih thu sawiin, "Hei hi tun thlengin Mizoram sorkar chuan a la tipuitling lo a, tihlawhtling thuai turin Mizoram sorkar kan phût a ni," an ti.

Sorkar laipui vêkin 7th. Pay Commission hman a nih hnuah World War-II veteren, an thihsan an nupuite leh 2nd. Assam Regiment hluite tana chhawmdawlna pek chu Rs, 6,000 - 10,000-ah tihsan tura a tih thu sawiin, "Mizoram Governor leh Chief Minister te pawhin tihsan a harsat loh tur thu an sawi tawh a, mahse, tun thlengin tihsan a la ni lo," an ti a; WW-II veteran mi 74 leh an thihsan an nupuite mi 491 leh 2nd. Assam Regiment disband mi pakua chauh an awm tawh tih sawiin, tunah hian WW-II veteran ten thla khatah Rs. 1,200 leh an thihsan an nupuite'n Rs. 1,000 an lak mek thu an sawi.




Share this Post

Login to comment
No Comments