Hnam sipai ruhro thlahna hun hmang

Ex-Mizo National Army (MNA) Association chuan nimin khan Synod Conference Centre-ah ram leh hnam tana zalenna suala nunna hlântute zinga mi 14-te ruhro thlahna hun an buatsaih a, MNF president Zoramthanga'n a hmanpui.

Ruhro thlahna inkhawm hi MNA army chief hlui Tawnluia, MNF senior vice president-in a kaihruai a; Zoramthanga chuan, "Kan ram leh hnam tana martarte hi an ṭhiante thi tawh la damte tan, Mizoram mipui zawng zawng tan, ṭhangthar lo la kal zel turte tan leh anmahni doa diriamtute tan an thi a ni. Ramhnuaiah leh ram palailengah te, a hretu nih pawh ngamawm loh leh phûmtu tur pawh awm mumal loin boruak rálṭi tak hnuaiah an thi a, vawiinah chuan an ruang dahna tur thlanmual ṭha tak nen hmingṭha tinrêng an rawn keng ve ta," a ti.

MNF President chuan, ram leh hnam tana martarte chu an la thangmawi zel dawn tih sawiin, "Ṭhangthar lo la awm zel turte'n an la rawn hlut tawlh tawlh dawn. An thih chhan hi 'Pathian leh kan ram tan' tia thi an ni a, Mizoramin chanchin ṭha a hril darh zel theihna tur atana thi an ni," a ti a; 'Pathian leh kan ram tan' tia an nunna hlan tate hmachhawp chu nung dama la awmte'n tihhlawhtlin tur a nih thu a sawi.

Hnam sipai 14-te ruhro hi inkhawm buatsaih a nih zawh hian Luangmuala Martar Thlanmualah dah a ni.



Share this Post

Login to comment
No Comments