Tuilian leh leimin vangin harsatna a thleng Ṭanpuina pe nghal turin Cabinet-in a hriattir

June 11-12 chhunga nilêng leh zankhuaa ruah a sûr avangin Mizoram hmun ṭhenkhatah leiminin chhiatna a thlen a, Mizoram lui hrang hrangte nasa takin a lian bawk. Tun hnaia khuarêl chhiatna tuarte chu ṭanpui nghal turin Mizoram Cabinet chuan sorkar official-te a hriattir.

Aizawl khawpui chhung

Aizawl khawpui chhung bikah chuan, nimin chawhma dar 9 vel khan Nursery Vengah Malsawmi in a chim.

Aizawl DC pisaa Disaster Management lam buaipuitu officer-te hnen aṭanga thu dawn danin, Nursery Venga in chim hian ina chengte chimpui mah se, thi an awm lo. In neitute chhungkuaa mi pahnih - Lalremruati (21) d/o Malsawmi leh Saihnuni (20) d/o Malsawmi te leh, in luahtu Zaumawia (54) leh a fapa Vanlalhriata (12)-te chu an hliam avangin damdawi-inah hruai an ni a; Vanlalhriata chu admit niin, a bak zawng chu first aid pek hnuah chhuahtir an ni.

Kum hmasa lama Hunthar Venga lei minna ṭhinah Thawhṭanni zan khan lei a min leh ṭan a, nimin lam­ah pawh a min belh zel. Leimin hian NH-54 chu a hnawh ping a, lirthei kaltlang theih a ni lo.

Disaster Management lam hotute chuan, Hunthar Venga leimin hi a zauh belh zel a, a chhaka B Sairengpuii (L) in tan a hlauhawm tawh hle tih an sawi a; B Sairengpuii building-a chengte leh a bul, Vaninmawia ina chengte chu nimin khan an inthiar chhuak.

Nimin zing khan Chanmari West leh Vaivakawn inkarah kawng chhak aṭanga lei leh lung tlain kawngpui a hnawh a, Ecosports car a delh. Lei/lung tla leh mai tur a awma hriat a nih avangin nimin khan Chanmari West-Vaivakawn kawngpui hi khar a ni a; fimkhur thilah a bul hnaia chengte chu nizan khan an riak chhuak.

Bawngkawn Brigade vengah leimin hlauhthawnawm a awm avang­in chhungkaw pahnihte'n bungrua an thiar chhuak a; Republic Veng field chhaka lei tlahniam chu a tlakhniam belh zel a, kawngpui pawh lirthei kal tlang theih lohin a chat tawh a ni. Edenthar Vengah kum hmasa lama lei che tawh ṭhin a che leh bawk.

Laipuitlanga Dunglena in hmunṭhenkhat a min a, hei vang hian Assam type in pakhat chu nimin tlai aṭang khan khawtlangin an ṭhiat ṭan nia thu dawn a ni. Ṭhuampui-Selesih via Zuangtui kawngpui chu nasa takin a bal a, lirthei a kal tlang thei rih lo. Thu dawn danin, kawng chhuat bal hi metre 30 vela thui a ni.

Chanmari-Ramhlun Laldenga Road-ah nimin chawhnu lam khan a chhak aṭangin lung lian tak tak a tla a, mihring thi leh hliam an awm lo. Chhinga Vengah retaining wall chimin kawng a hnawh a, nimin vêk khan thenfai nghal a ni.

Aizawla leimin vanga chhiatna thlengte hi Aizawl Bawrhsap pisaa officer-te chuan nimin khan a hmun­ah an enfiah a, a ṭul angin chhawm­dawlna an pe a ni.

Aizawl páwn lam

Mizorama lui sei ber Tlawng lui a len belh zel a, nimin lam khan chenna in a chîm ṭan. Hei vang hian nimin tlai thleng khan Sairang V/C huam chhunga chhungkaw 12 leh Sairang Dinthar V/C huam chhunga chhungkaw pahnih chuan an in aṭangin bungrua an thiar chhuak. 

Tlawng lui lian hian Bairabi-ah pawh harsatna a thlen ṭan a, Tlawng luiin lei a lâk belh avangin Bairabi Chhimvenga Lalthandangi te in tan a hlauhthawnawm a, an inthiar chhuak nia thu dawn a ni.

Zawlnuam Bawrai kárchehtu Langkaih lui leh Bawrai luite nasa takin a lian ve ve a, nimin chawhma lam khan lui pahniha leite tuiin a chîm ve ve bakah, nimin tlai lam aṭang khan chenna in eng emaw zat bakah BCM biak-in sak mek a chîm a, Bawrai khelmual pawh a chîm vek bawk.

Tuirini lui pawh nasa taka a len avangin Sesawng leh Khawruhlian inkara Tuirini lui chu tun dinhmunah kal kai theih a ni rih lo. Hemi chungchangah hian Khawruhlian Joint YMA chuan ngenna siamin, ruah a tla reng a nih chuan chincháng hre hmasa lo chuan Tuirini lui kân zawnga zin chhuak lo turin mi tin an ngen. Khawruhlian Joint YMA hian Tuirini lui dinhmun an hriat reng theih nan duty an insiam a ni.

Darlung Vengtharah lei a tlahniam a, Lalhmunsiama in chu luah tlak loha a awm avangin nimin khan hnatlangin an ṭhiat a; Vanlaltluanga in pawh an rauhsan. Heng hmunte hi bialtu MLA Lalrobiaka'n nimin khan a tlawh a, ṭanpuina a pe.

Thenzawl khaw chhungah Lau lui lianin a chîm zau hle a, harsatna a thlen nual tawh a ni.

Khawthlangtuipui pawh a lian tawh hle a, chenna in ṭhenkhat a chim ṭan tawh nia thu dawn a ni.

Thawhṭanni zan dar 9 vel khan Ramlaitui khuaah lei a min a, Aizawl-Lunglei World Bank road a hnawh ping a; kawng ping hi nimin lam kha chuan tihtlang a la ni lo. World Bank road hi Ṭhiak khaw dáiah pawh leiminin a hnawh a; he thu ziah lai thleng hian LMV chin hnuai lam chiah kaltlang theih niin, min belh mai thei tura ngaih a awm avangin fimkhur a ngai hle niin Ṭhiak Branch YMA hruaitute'n an tarlang.

Hnahthial Kanan vengah pawh tun hmaa lei tawlhna ṭhinah lei a tawlh leh a, NH-54 kawngpui tichhiain, lirthei lian tan kal tlang theih a ni lo. Thu dawn danin, Hnahthiala lei tawlh hi a dâwlna checkdam chawpin a tawlh a, LMV hnuailam bak tlan ngam a ni lo.

Nimin vêk khan Serchhip Sailam Vengah Dárêngi in, Assam type chu lei tawlh avangin a chim a, thi leh hliam an awm lo nia thu dawn a ni.

Cabinet thuchhuak

Mizoram Cabinet chu nimin khan chief minister Lal Thanhawla hoin CS conference hall-ah an ṭhukhawm a; tun hnaia ruahsûr vanga harsatna tâwkte chu a theih ang anga ṭanpuina pe nghal turin district bawrhsapte leh Disaster Management & Rehabilitation (DMR) department-te a hriattir.

Cabinet hi June 10, 2018-a an meeting ṭuma agenda an ngaihtuah zawh hman lote ngaihtuah turin an ṭhukhawm a; meeting chuan, "Tun hnaia nasa taka ruahsûrin chhiatna Mizoram hmun hrang hranga a thlen hi pawi kan ti a, kan tawrhpui tak zet a ni," an ti.

Cabinet chuan, DC-te chu an bial ṭheuha chhiatna thlengte uluk taka chhinchhiah a, finfiahna video nen DMR department-a thehlut tura an hriattir bakah, DC leh DMR-te chu a theih ang anga ṭanpuina pe nghal tur leh mipuite harsatna sutkianpui turin an hriattir a ni.

Cabinet meeting-ah hian meeting hmasaa an rel zawh hman lo agenda no. 27 aṭanga no. 45 na thleng ngaihtuah a ni a, he thu ziah lai hian an thurelte kan hre hman lo.



Share this Post

Login to comment
No Comments