Ngaihtuahna thar sêng turin BJP-in Mizoram mipui an chah

BJP, Mizoram Pra­desh hruaitute chuan, Congress party sorkarna, Karnataka Assembly-ah BJP-in hnehna an chang chu lawmawm an tih thu an sawi a; India rama inthlanah BJP an chak zel avangin, Mizoram inthlan turah pawh ngaihtuahna thar sêng a, India ram sûkthlêk zir chiang turin Mizoram mipui an chah.

Mizoram BJP general secretary Vanlalhmuaka leh media in-charge Lalrozara te chuan nimin khan BJP pisaah thuthar thehdarhtute an kâwm a; Lalrozara chuan, Karnataka-a BJP chak chu BJP an pun hluai vang a ni lo tih sawiin, "Congress ṭinsan leh duh tawh lo an tam a ni. Karnataka-a Congress Chief Minister tla ta hi corruption-ah puhmawhna tur a awm lo a, hna pawh a thawk ṭha. Mahse, mipuiin BJP an duh tlat a, an thlang tling a ni," a ti.

Lalrozara chuan, BJP sorkarna apianga cor­ruption a tawm nia sawiin, "Congress hi dynasty (chhungkaw thuneihna) loin an kal thei lo a, mipuiin dynasty an ning tawh. BJP chuan dynasty a duh lo, mipui pawhin an duh lo. Congress hi mi tlemte rorelna (oligarchy) a ni bawk a, hetiang hi BJP chuan a hnâwl a ni," a ti a; Congress party rorelna chu mi hausa leh langsarte (noble man)-te len zual zelna a nih avangin, chu chu mipuiin an duh loh chhan a nih bawk thu a sawi.

Congress sorkara thil ṭha lo zawng zawngte chu BJP-in a thlak ta zel nia sawiin Lalrozara chuan, "Inthlanna awm apiangah BJP a chak a, kum 2019 Lok Sabha inthlanah pawh BJP a sorkar leh dawn chiang a ni," a ti. Congress party-in tunah chuan India rama state zingah Mizoram leh Punjab-ah chiah an sorkar tawh tih sawiin, kumina Mizoram Assembly in­thlan awm turah pawh ngaih­tuahna thar sêng turin Mizo­ram mipuite a chah a ni.

Lalrozara sawi danin, kum 2014-a Lok Sabha inthlan laiin Congress party chu state 12-ah sorkarna an chelh a, tunah chuan state pahnihah chiah sorkarna an chang tawh a; chutih laiin, BJP chuan kum 2014-ah state pathumah sorkarna an chang a, state dang pakhatah sorkar siamtu zingah an telh ve chauh laiin, tunah chuan state 21 (NDA anga an sorkarna telin)-ah sorkarna an siam tawh a ni.



Share this Post

Login to comment
No Comments