Mizoram per capita income sang hi thil ropui a ni lo - MNF Vice President

MNF vice president Dr R Lalthangliana chuan, leiba ngah tak chunga per capita income sang chu thil ropui a ni lo tih sawiin, "Mi hausate'n retheite an hliahkhuh vang a ni," a ti.

Dr R Lalthangliana hian May 14, Thawhṭanni khan MNF Aizawl South-III South Block-in Sialsuk YMA Hall-ah SEDP training programme an buatsaihah thu sawiin, "Kumin budget cheng vbc. 9492.38 a ni a, budget hi a lu nungin insem ila, mi pakhatin cheng nuai khat dáwn kan chang ang. Chutih laiin, nau piang hlim hlawl pawh Rs. 70,000 leh 80,000 inkar vel leiba nei nghal ang kan ni," a ti a; state lian Uttar Pradesh leh Maharashtra-ah pawh chawhrualin mimalin leiba Rs. 30,000 nei ang an pelh loh laia Mizoramah Rs. 70,000 chuang leiba nei ang a ni chu a mualphothlak hle niin a sawi.

R Lalthangliana chuan, Mizorama mimal tin sum deh chhuah (per capita income) sang vak anga lang chu belhchian dâwl lo a nia sawiin, "Thawh chhuah tak tak awm lo, minister leh sorkar hnathawk liante sum lak luh sang uchuakin thawh chhuah nei ve lo, retheite min hliah vang mai mai zawka sang anga lang, kut hnathawkte la retheih belh rengna a ni," a ti.

MNF Vice President chuan, SEDP an ruahmana tih tur an siamte tihhlawhtlinna turin sum ngaihtuah chawp a ngai dawn lo a, sum a awm sa vek nia sawiin, "Budget session hmasa berah cheng vbc. 1,000 chuang fé kan dah nghal dawn," a ti a; SEDP chu chhung tinin lei rem an rah theihna tura hlawhtlinpui ngeina tur niin a sawi bawk.

Sialsuk YMA Hall-a SEDP training programme-ah hian Dr R Lalthangliana hian Samlukhai aṭangin voter 18, Ṭhiak aṭangin voter 23, Sumsuih aṭangin voter 33 leh Chawilung aṭangin voter 43, a vaiin voter 117 MNF-ah a lawm lut niin MNF thuchhuah chuan a tarlang.



Share this Post

Login to comment
No Comments