May 18, 2018 ral hmaa Tuichawngchhuah Khaw mite sawn chhuak turin sorkar phût

Mizo Students' Union (MSU) general headquarters chuan thuchhuah siamin, CADC huam chhunga Tuichawngchhuah khua chu dan loa khaw din a ni tih an tarlang a; Tuichawngchhuah khuaa chengte zawng zawng chu May 18, 2018 ral hmaa la chhuak turin sorkar an phût a, an hun tiam ral hnua lak chhuah an nih loh chuan MSU-in hma an lak tur thu an puang.

MSU hian nimina MSU pisaa an hruaitute an ṭhutkhawm hnuah thuchhuah an siam a, Tuichawngchuah khua chu dan loa din a nih avangin ṭhiah a nih theih nan MSU-in hma an la tawh ṭhin tih tarlangin, "Hmalak a nih mek laiin zirna-in ṭha tak te, water supply leh power supply ṭha takte pek belh zel an ni," an ti.

MSU chuan, CADC chhunga dan ang taka cheng Zo hnahthlakte erawh nasa taka enhran an nih thu sawiin, "Development tam takah hrêk an ni a, MSU chuan a hre thiam lo hle," an ti a; chumi chungchang chu a bialtu MLA leh CADC hotute pawh an hriattir tawh thu an tarlang.

Tuichawngchhuah chung-changa MSU-in hma a laknaah, sikul kângah MSU thil tih nia ngaiin Aizawl leh Lungleia MSU hruaitu eng emaw zat man an ni a, Lunglei District Jail-ah tàntir an ni tawh tih sawiin MSU chuan, "Mizoram sorkar chu High Court-ah an khing hial a, mahse, he khua hi dan loa din a a nih avangin High Court chuan tun hnai khan case a titawp a ni," an ti.

MSU chuan, Mizoram PWD hnuaia kawngpui siam hna thawktu company leh contractor zawng zawngte chu hun tiam chhunga hna thawk zo ngei turin an ngen a, "Hun tiam chhunga hna thawk zo thei lo company/contractor hrem an nih theih nan a ṭul angin MSU chuan hma a la dawn," an ti a; company/contractor hna thawk ṭha lote chu hna dang pe tawh lo turin sorkar thuneitute an ngen a ni.

MSU chuan, Bairabi khaw­­tlangin zirtirtu indaih loh vanga MSU sub-headquarters, Bairabi kaihhruainaa zirna-in an khâr chu pawi an tih thu leh, an harsatna chinfelsak vat tura sorkar an phût thu an tarlang bawk.



Share this Post

Login to comment
No Comments