Mizoram State Higher Education Council (MSHEC) chu nimin khan Aijal Club-ah an chair­man R Romawia, Higher & Technical Education (HTE) minister hoin an ṭhukhawm a, hmalakna hrang hrang an thlirho. He hunah hian Mizoramah sorkar college 24 a awm thu tarlan a ni.

HTE Minister chuan, kawng hrang hrangah zirlaite hmakhaw ngaiin zirna-in sang zawkte tih­hmasawnna hna Mizoram sorkarin a thawh mek thu a sawi a, "Hemi kawng­ah hian SHEC chu mawhphurhna sang tak neitu a ni. SHEC Coun­cil member te, RUSA office-a thawkte leh HTE department enkawl college hrang hranga coordinator-te inpêkna avangin Mizoram chhunga college tinah hma­sawnna duhawm tak tak hmuhtur a awm tawh a ni," a ti.

HTE secretary Asish Kundra chuan, hun tiam chhunga Mizoramin hmachhawp a neihte sorkar laipui hnena thehlut tura ṭan lak a nih thu sawiin, "RUSA ṭanpuina sum dawng thei tura college-te tana National Assessment and Accreditation Council (NAAC) accreditation neih a ṭul," a ti a; Mizoram college zingah zirlaite'n luh an châk zualna tur bik, a subject azira college ṭha filawr bikte an awm theih nan tehna leh tehfung rintlak siam a pawimawh thu a sawi.

SHEC member-sec­retary Thanglura tarlan danin, MSHEC hnuaiah sorkar college 24 a awm a; chu'ng zinga 12 chu Aizawl district-a awm a ni a, Lunglei district-ah pathum, Champhai district-ah pahnih, Lawng­tlai district-ah pa­hnih, Mamit district-ah pahnih, Kolasib district-ah pakhat, Siaha district-ah pakhat leh Serchhip district-ah pakhat a awm.

Kum 2016-17 chhung khan Mizoramah college zirlai 14,393 an awm a, chu'ng zinga 7,429 chu mipa niin, 6,964 chu hmeichhia an ni.

 Arts subject la zirlai awm zat chu 11,698 a ni a, science subject zir chu 858 leh commerce subject la 541 awmin, a bak zawng chu law, computer leh a dang zir an ni.

Mizoram sorkar college 24 zingah hian college 21-in NAAC acc­re­ditation an nei tawh. 

Share this Post