T. Sailo Basic Needs kan kalpui ang - Lalduhoma

Ṭangrual pawl Zoram Peoples' Move­ment (ZPM) chief ministerial candidate Lalduhoma chuan, "ZPM kan sorkar chuan Brig. T Sailo-in a lo duan chhuah Six Basic Needs kha hna hmasaah kan neih ang a, ni tin mamawh atana pawimawh eirawngbawlna gas ang chite kan hlamchhiah lo ang," a ti. 

ZPM hruaitute'n nimina Kolasib Press Club-a thuthar thehdarhtute an kawmnaah Lalduhoma chuan, "ZPM a sorkar chuan bána kaih (hand holding) policy kan nei dawn a, chhanchhuah ngaite chhanchhuah thuai kan tum ang. Hydel project leh solar project hmangin kum nga chhunga kawlphethaa intodelh kan tum," a ti a; Tlawng lui bik chu Brig. T Sailo bul ṭan tawh a nih vangin khuah ngei an tum thu a sawi.

Lalduhoma chuan, kut hnathawktute an bána kaih a, bul ṭanna atan sawhthing kg. khat Rs. 50 leh hmunphiah Rs. 100-a an leisak tur thu a sawi a, "Sorkar aia ngam sang an awm chuan kan dîp lo ang. A tahtawlin ruahmanna fel taka siam zui a ni ang," a ti.

'ZPM-in sorkar kalphung thar a tih tak chu eng nge,' tih zawhna chhangtu ZPM campaigner PL Liandinga chuan, "Chief Minister-in development department a enkawl dawn lo a, minister-te hna thawh a enpui mai dawn a, Val Upa Council-in sorkar a uap ang," a ti a; CM-in dik leh chak taka hna a thawh miau chuan Super Chief Minister-ah chhâl a nih mai tur thu a sawi.

Inkawm khawmna hi ZPM Steering Committee chairman Lalliansawta'n a kaihruai a; Lalduhoma bakah MPC vice president Vanlalhlana, ZPM campaigner PL Liandinga leh ZPM general secretary K Sapdanga te an tel.

Ṭangrual Pawlte hian May 14, Thawhṭanni zan khan Bairabi leh Vairengte-ah inkhawm an buatsaih tawh a, nizan khan Kolasib-ah vantlang inkhawm an buatsaih leh a ni. 



Share this Post

Login to comment
No Comments