Excise & Narcotics Service Assn.-in Rampanmawia chungchang an sawifiah

Mizoram Excise & Narcotics Service Association (MENSA) chuan thuchhuah siamin, 20.8.2012-a damdawi khehna khawl nena an man, Rampanmawia s/o Thangzuala (L) laka thubuai siamsak zelna tlak hmuh a nih loh thu an tarlang.

MENSA chuan, case IO-in thu a zawhnaah Rampanmawia chuan tun hmain zarda leh tuibur, vaihlo leh damdawia a sumdawn ṭhin thu a sawi tih an tarlang rualin, "A hnen aṭangin damdawi pakhat mah man a ni lo. Case IO hmaa a statement pek hi chawp leh chilhin a pha leh nghal a, signature pawh a pe lo. He statement hi Court-in confessional statement a tih ang hi a ni lo a, confessional statement chu accused-in Magistrate hmaa Cr.PC section 164 hnuaia a inpuanna hi a ni," an ti.

MENSA chuan, Rampanmawia kut aṭangin damdawi man a ni lo a, damdawi khehna nia rinhlelh nen chauh chuan Court-a kalpui zel turin thu tling (prima facie) hmuh a ni lo tih sawiin, "Case IO hian Court-ah ni 27.8.2012 khan final report thehlutin, thubuai siamsak zel tlak a ni lo tiin a thlen a ni," an ti a; case IO thu angin magistrate pawhin Rampanmawia chu a chhuah ta niin an tarlang.

Excise & Narcotics department kaihhnawih thil sawifiah tur a awm avangin Excise & Narcotics commissioner-in Health Minister chu a press conference-ah a ṭawiawm ve tih sawiin, MENSA chuan, "Commissioner-in tih sual a nei lo a, Central Civil Service (Conduct) Rules, 1964 a zâwm mai zawk a ni," an ti.


Share this Post

Login to comment
Latest Comments (1)
Hlatekhua - 13th Sep 2013 10:55:41 AM

A inlei chhuak a ni lek lo maw le?