Fire Service Day hman a ni

April 14, Inrinni zing khan Fire & Emergency Services headquarters, Hunthar Vengah Fire Service Day leh kângmei ṭhelhnaa thite sûnna hun hman a ni. Kumina Fire Service Day thupui chu 'Fire loss is national loss - Let us adopt fire safety measures' tih a ni.

Fire & Emergency Services director PC Lalchhuanawma chuan, kum 1944-a British indo lawng puaka kângmei chhuak ṭhelhtute zinga Bombay service mi 66 leh Bombay Salvage corps mi 11-in nunna an chàn thu a sawi a, "Heng mi huaisente hriatreng nan leh kum tina kâng ṭhelhna a nunna hlantu fire service mi leh sate hriatreng nan April 14 hi India ram pumah Fire Service Day leh Martyr's Day atan hman a ni," a ti.

PC Lalchhuanawma chuan, April 14-20 chhung chu Fire Service Week atan kum tin­in hman ṭhin a nih thu sawiin, "Fire Service haptain a tum ber chu, mipui vantlang leh mi tinin an ni tin nun, khawsak leh chêt velna tinrengah kângmei tichhuak lo tura invenna leh fimkhur nachang an hriatna tura inzirtir nan a ni," a ti.

Kum 2012 aṭanga 2017 thleng khan Mizoramah kângmei chhuak avangin in 537 a kâng a, mitthi 54 leh hliam 79 awmin, bungraw kâng chhia zawng zawng hlutna chu cheng vbc. 383.7 a ni.



Share this Post

Login to comment
No Comments