Aizawl City Local Council Association-in Sa man, lu meh man, mistiri rate bithliah

Aizawl City Local Council Association (ACLCA) hruaitute April 14, Inrinnia Zarkawt Recreation Hall-a ṭhu­khawm chuan Aizawla mipa lu meh man, vawksa man leh mistiri hlawhte an bithliah.

ACLCA chuan lumettu pawlin Aizawla lu meh man Rs. 50 aṭanga Rs. 70-a an tisang chu to deuha an hriat avangin, a hmaa lu meh man Rs. 50 anga kalpui zel ni se, an ti a; lu meh man hi veng tinah zawm a nih ngei theih nan Aizawla local council tinte chu an huam chhung ṭheuhah hma la turin an hriattir.

November 2017-a Mizoram Consumer Union leh Aizawl City Vawksa Zuar Associa­tion-in inremna an lo siam tawh angin, vawksa man chu kg. khat Rs. 280-a hralh ni se, ACLCA chuan an ti a; rate bituk aia toa vawksa zuar lo tura mi tin an ngen bakah, LC tinte chu an huam chhungah puangzar tur leh khauh taka kengkawh turin an hriattir a ni.

Tun hnaia Mizoram Mistiri Association-in ni khat hlawh a tihsan chungchang pawh ACLCA chuan an ngaih­tuah a; mistiri hlawh chu ni khatah Rs. 700 ni se, helper hlawh chu Rs. 350 ni se, an ti a; mistiri rate hi veng tinah hman a nih theih nan LC tinte chu an huam chhung ṭheuhah chak taka hma la turin an ti bawk. 

Inrinnia ACLCA meeting hi an president R Lalchhuanawma'n a kaihruai a; Aizawl khawpuiah hian LC 83 a awm mek a ni. 



Share this Post

Login to comment
No Comments