Mizoram-Assam ramri enfiah mek a ni Tun karah Vairengte lam an enfiah dawn

Sorkar laipuia Ministry of Home Affairs (MHA)-in Mizoram leh Assam ramria Inner Line Reserve Forest enfiah tura a din Joint Verification Team chuan April 13, 2018 khan Zophai leh a chhehvelte an enfiah leh a, heti hian Bairabi leh Hailakandi lam hnaih chu an enfiah zo. Naktuk aṭangin Vairengte-Cachar lam an enfiah leh ang.

MHA Joint Verification Team on Inner Line Reserve Forest area Illegal Construction hian ramri enfiah hna hi April 12-ah an ṭan a; April 12-ah team member-te'n a huhoin hmun hrang hrang an enfiah hnuah, April 13-ah chuan team pali-ah an inṭhen a, a ni khatnaa an la enfiah lohte an enfiah leh a ni.

MZP president L Ramdinliana Renthlei hnen aṭanga thu dawn danin, April 13-a enfiahnaah hian Inner Line Reserve Forest (ILRF) huam chhungah dan loa sak in ding lai 74 hmuh a ni a, chu'ng zingah chuan Assam IR police post in panga, mandir pakhat leh vai biak-in pakhat a tel. In bakah, leilet, lakhuihthei, kuhva leh balhla huante a awm bawk.

Endik zingah Mizo leilet eng emaw zat a tel a, in ding bik chu Mizo ni lo, hnam dang in a ni tlangpui. Mandir tlanga in leh huante chu Bru ho ta a ni hlawm a, Bru in 23 vel a awm. Bru in awm zinga ṭhenkhat chu kum 10, kum 18, kum 5 lo awm tawhte a ni. Bru-te hian Assam-ah vote an nei hlawm a, Assam-ah vote an thlak ṭhin.

Bru-te chu Tripura leh Mizoram aṭanga luta awm an ni hlawm a; Bru pa pakhat chuan, tuna an awmnaah chuan Assam Forest department-in an awmtir a, huan awm sate chu Assam Forest chin sa niin, Forest department-in an enkawltir niin a sawi.

April 12-13 chhunga Bairabi lama ILRF huam chhung enfiahnaah hian in 108 hmuh a ni a, leilet leh huan nghet eng emaw zat a awm bawk. 

ILRF endiktu Joint Verification Team-ah hian Mizoram aṭangin Kolasib DFO Lalnunzira, 1st. IR commandant HL Thangzuala, Kolasib SDC Samuel Zodinsanga leh sorkar hotu dangte bakah, MZP aṭangin president L Ramdinliana Renthlei leh MZP Kolasib headquarters leh Bairabi sub-headquarters hruaitute an tel. Assam lam chu Hailakandi DFO NH Majumdar-a'n a ho a ni. 

Joint Verification Team hian naktuk, Thawhlehni aṭangin Vairengte/Lailapur lama ILRF huam chinte an enfiah leh dawn a ni.



Share this Post

Login to comment
No Comments