MSHCS Governing Board an ṭhu

Mizoram State Health Care Society (MSHCS) Governing Board chu nimin khan Health minister Lal Thanzara hoin Chief Minister’s Office conference hall-ah an ṭhukhawm a, thil pawimawh chi hrang hrang an sawiho.

MSHCS Governing Board meeting vawi 16-naah hian medical reimbursement (MR) bill endik (screening)-na atana thawktu leh hmanraw mamawh turte ngaihtuah niin, MSHCS-in thawktu a lak dan turte sawiho a ni a; Health Management Information System changtlung tak siam a, billing record zawng zawng computerise-a online-a thehluh theih tura ruahmanna siam te, bill screening tih aṭanga commission lak chungchangte sawiho a ni.

Kum hmasa lamah sorkar hnathawkte MR bill zirchianna Sub-Committee on MR report-in a lo tarlan tawh angin, family declaration dik tawk lo te, bill theih chin bak bill ṭhin avang leh thil dang hrang hrang vanga MR bill screening ṭha tak neih a pawimawh avangin, chumi bawhzuina atan chuan sorkar hnathawkte MR bill pek tlak a nih hmain MR bill-te endik turin MSHCS kuta dah rawt a lo ni tawh a ni.

Meeting-ah hian Health secretary Lal­rinliana Fanai, Finance secretary Lalmalsawma leh MSHCS member dangte an tel.



Share this Post

Login to comment
No Comments