Election duty laia nunna chánte rál

Election Commission of India (ECI)-in in­thlan duty laia vanduaina tâwka thite hnena ràlna sum a pek ṭhin chu nimin khan Champhai district-a election duty laia thi IR police pahnih chhungte hnenah Champhai addl. DC Lalsangpuii'n DC conference hall-ah ràlna sum cheng nuai 10 ve ve a hlan.

Champhai DC chuan, vanduaina tâwk chhungte chu thinlung leh tih tak zeta a tawrhpui thu sawiin, "Ram leh hnam tana mawhphurhna hlenna tura an inpekna hi a fakawm hle. Sorkar pawhin ram tana an inpekna hlu tak a hriatpui a, an mahni ràlna sum pawh a hlan a ni," a ti a; vanduaina tâwka thi police chhungte chu an kalzelna turah duhsakna a hlan.

Election duty laia boralte chu 2nd IR battalion-a mi ve ve - constable C Lalnghakliana s/o Pi Lalthangbiki, Champhai Bethel Veng leh Hav. Bikram Chorai h/o Pi Neitianli, Khawzawlte an ni.

C Lalnghakliana hi Punjab leh Uttar Pradesh inthlanpuia a duty haw lam chu February 21, 2017 khan Basti Railway Station, Uttar Pradesh aṭangin a chin chhui zui tur awm loin a bo a; Hav. Bikram Chorai pawh Manipur inthlanpuia a duty chu damlohna vangin February 25, 2017-ah a inenkawlna hmun Guwahati-ah a thi a ni.



Share this Post

Login to comment
No Comments