Mizo journalist-te kut an tawrh dan MJA-in sorkar laipuiah a thlen dawn

Mizoram Journalist Association (MJA) General Headquarters chuan nimin khan Aizawl Press Club-ah General Body Meeting an nei a, kumin March 8 leh 10-a Bairabi Zophaiah Mizo chanchinbumite'n Assam police-te kut an tawrh chungchang an ngaihtuah. Thil thleng chungchang chu sorkar laipuia thlen an rèl bakah, vawiin hian Aizawlah lungawi lohna an lantir dawn. 

MJA tarlan danin, Zophaia Assam police leh MZP inep chanchin ngaih­vena kal Mizo chanchinbumi zinga pasa­rihin Assam police kut an tuar a; chanchinbu­mite tawrh dan chu thlalakte nen Prime Minister of India, Press Council of India, Union Home Minister, DoNER Minister, Assam Chief Minister, Women’s Commission, Mizoram Chief Minister leh mi pawimawh dangte hnena thlen an rel a ni.

MJA chuan, Assam police kut tuar Mizo journalist-te'n police-ah FIR an thehlut vek tawh a, hliam an tawrh dante pawh doctor-te'n an enfiah tawh tih sawiin, "A ṭhen chu damdawi hmanga enkawl an la ni mek a. MJA chuan a theihna apiangah a tawp thlengin a bawhzui zel dawn a. Chanchinbumite dikna hai lan a nih hma chu a tawp thlengin hma a la dawn a ni," an ti.

MJA tarlan danin, March 8, 2018-ah Mizoram chanchinbumi pahnihin Zophaiah Assam police kut an tuar a, chu thil thleng chu an dem thu press release chhuahin an tarlang. March 10-ah Zophaiah bawk Mizo hmeichhe journalist pahnih tiamin, Mizo journalist pangain Assam police kut an tuar leh a, chumi ṭum chuan Assam police-te'n silai vawi riat an kâp puak a ni.

Mizo journalist-te'n an nihna tichiang turin an identity card an hmuhtir bakah, ṭawngkaa an insawi chungin Assam police-te'n kut an thlak tho tih an sawi a, "Assam police pakhat phei chuan silai nen a vau hial. Mizo journalist pakhat bike chu press sticker inbel reng chungin an vuak chhiatsak bawk. Journalist-te chunga râwng taka chetna thleng hi MJA chuan kan dem tak zet a ni," an ti.

Mizoram chanchinbumi kutthlaktute chu Assam sorkarin man ngei se an duh thu sawiin MJA hian, "An phû tâwkin na takin hrem ngei se kan ti," an ti a; chan­chinbumite bungrua an tihchhiatsak man hû rûl tur leh an hliam enkawlna senso pawh tumsak tura an phût thu an sawi.

MJA chuan, Mizoram journalist-te'n March 8-ah Assam police-te kut tawrh tawh laia March 12 thlenga Mizoram sorkar aṭanga journalist-te thlavang hauhna leh thlamuanna thu hriat tur a la awm chu khawharthlak an tih thu an tarlang bawk.

MJA hian Mizoram journalist-te chunga Assam police-te chet dan duh lohna lantir nan vawiin chhun dar 12:00 - 1:00 inkar hian Vanapa Hall kawtah sit-in demonstration an nei dawn a; district khawpui dangahte pawh MJA member-te'n an lo huaihawt ve tura ngaih a ni. 



Share this Post

Login to comment
No Comments