CM Hawla'n Home Minister hnenah Assam silai hmeh puah dem thu a thlen

Chief minister Lal Thanhawla chuan nimin khan Union Home minister Rajnath Singh hnenah lehkha thawnin, Assam police-te'n Mizo ṭhalaite laka silai an hmet puak chu pawi a tih thu leh a dem thu a thlen. 

Chief Minister chuan a lehkhaah hian, ṭhenawm state dangte ang bawkin Mizoram leh Assam-in ramri an inṭâwm a, Mizoram union territory a nih hnu leh state puitling a nih hnu thleng pawhin ramri tihfel loh a neih thu a tarlang a, "Ramri inchuh thubuai avangin vawi tam tak innghirnghona a chhuak tawh ṭhin a, hei hian he lai hmuna khawsate tan harsatna a thlen fo tawh a ni," a ti.

State pahnih inkara ramri chungchang inbiakna hnu­hnung ber chu kum 1995-1996 ah Chief Secretary level-ah neih a nih thu tarlangin Chief Minister Hawla chuan, "Hetah hian state pahnih Chief Minister-te inkara inbiakna neih ni se tia rawtna chu Assam Chief Minister-in a hnial a ni," a ti a; remna leh muanna a awm theihna tur leh ramri chungchanga inbiakna a hma thei ang bera chhunzawm a nih theih nana hma la turin Union Home Minister a ngen a ni. 



Share this Post

Login to comment
No Comments