District tinah Fire Prevention Week hawn a ni

Nimin khan district khawpui hrang hrangah Fire Prevention Week 2018 hawn a ni. Fire Prevention Week hi Lungleiah chuan Convention Centre-ah Lunglei HPC vice chairman S Laldingliana'n a hawng a; S Laldingliana chuan, kângmei venna hapta chu kângmei chhuak tawh lo tura hma thar lakna ni se a duh thu sawiin, "Tun thlengin Mizoramah kângmei a la chhuak ṭhin hi a pawi hle. Kângmei ven leh environment humhalhna kawngah sorkarin nasa takin hma a la chhunzawm zel dawn a ni," a ti.

Lunglei DFO Dr C Vidhyasagar tarlan danin, India ramah hmarchhak bialah kângmei a chhuak nasa bik a, Mizoram chu India rama kângmei chhuak nasa state panga zingah a tel. Kum 2017 chhung khan Lunglei district-ah kângmei chhuak vawi 234 report a ni a, chu'ng zingah chuan lo hâl vangin ṭum 226 kângmei a chhuak a ni.

Champhaiah chuan Fire Prevention Week hi Champhai College-ah principal Lalnunmawia'n a hawng. Lalnunmawia chuan, fimkhur tawk loh vanga ṭhál chhung rei lo têa kângmei chhuak ṭhin chu pawi a tih thu a sawi a, "Ram kan chhan ber chu, lo, huan leh leipui hâl dawna meilam sial ṭhat loh vang te, ramvâk leh mi kuthleite vang a ni," a ti.

Champhai DFO C Lalbiaka tarlan danin, Champhai district-ah khaw 101 a awm a, chhungkua 23,450 zinga 8,736-te chu lo neia eizawng an ni. Nikum chhung khan khaw 10 velah kângmei a chhuak. Khaw 45-ah Village Fire Prevention Committee din a ni a, sikul 49 leh khaw 48-ah kângmei laka inven dan zirtirna hun hman a ni.

Siaha-ah chuan MADC Forest Hall-ah MADC chief executive member N Zakhai-a'n a hawng. N Zakhai chuan, ramngaw humhalh a pawimawh thu sawiin, "Tunah pawh kan ram sik leh sa nuam tak ṭhin kha a bo ṭan mek a, a kum têlin fûr, ṭhál, nipui leh thlasik pawh a tawrhhlelawm tulh tulh tawh a ni," a ti.

Mamitah chuan district bawrhsap Lalbiaksangi'n Mamit College conference hall-ah a hawng. DC chuan, tuihna tam tak a awm theih nan leh tuihna awm sate pawh tawp mai loh nan thing phun uar zel turin mipui a chah.

Mamit DFO Lalnunsanga Khawlhring tarlan danin, kum 2017 chhung khan sorkar hun bituk chhunga lo hâl vek khaw 15 an awm a, hun tiam chhunga hâl thei lo chhungkaw 1,343 awmin, April 15, 2017 thlenga lo hâl thei lo khaw pariat an awm. Ruahtui a tlak hma avangin dan zâwm lote hrem a ni lo.

Kolasib-ah chuan Fire Prevention Week hi DC R Zarzosanga'n Taitesena Hall-ah a hawng. DC chuan, khawvela ram changkang leh hmasawn tak tak USA leh Europe-te pawhin ram kâng chu an buaipui thu sawiin, "Mizoramah pawh kum tin deuh thaw ram kâng leh in kâng a awm a, hei hian khawtlang leh ramngaw tan harsatna nasa takin a thlen ṭhin," a ti.

Serchhipah chuan DC conference hall-ah DC Sangchhin Chinzah-in a hawng. DC chuan, kum tin Mizorama ram kâng a awm ṭhin chu mipuite'n a ram neitu kan nih anga kan ram kan enkawl loh vang leh a chhe zawnga nghawng a neih dan hriat loh vang nia a hriat thu a sawi.

Serchhip district MJA president C Ramengmawia pawhin thu sawiin, kângmei chhuak tam ber chu fimkhur tâwk loh vang a nih thu a sawi a, "Mizoram sorkarin kumina lo leh huan hâl tur neite tan March 15 hmaa hâl tura ruahmanna a siam hi zawm theuh a ṭul. Lo leh huan hâl tur neite chuan ṭha taka meilam sial tur a ni," a ti.

Fire Prevention Week hi Lawngtlaiah chuan DC conference hall-ah DRDA project director R Lalremsanga'n a hawng a; sorkar department hrang hrang hotute leh LADC-a officer te, V/C-te leh tlawmngai pawl hruaitute an tel a ni.



Share this Post

Login to comment
No Comments