Congress-in MLA 10 an nei tling tawh lo ang - Zoramthanga

MNF Ṭawi West Block chuan nimuin khan Thingsulthliah community hall-ah hnam pasalṭhate chawimawina leh block conference an hmang a; MNF president Zoramthanga'n thu sawiin, Mizoram Assembly inthlan awm leh turah Congress party-in MLA 10 an neih tlin a rin loh thu a sawi.

Zoramthanga chuan, Congress party chu Central-ah an tla fai tawh a, state inthlan apiangah an tla zel bawk niin a sawi a, "A zîk la awmchhun Mizoram Congress sorkar hi kum tawp inthlanah kan fik hmawk ang a, a tam berah MLA 10 pawh an neih ka ring tawh lo. Kum tawpah chuan India ramah Punjab state-ah chiah an sorkar tawh ka ring. Pathian leh mipui zarah MNF kan sorkar ngei ngei ang tih lo ring rawh u," a ti.

Mizo hnam pasalṭhate leh an chhungkua te, MNF-a awm mekte'n mi sak ve theih loh hla mawi an nei tih sawiin Zorama chuan, "Ram leh hnam tana lu chhum, bân chhum huama an nun an lo hlanna te, kan hnam damna atana kan inpek tawhna ang hi tute'n emaw sawi nêp tum mah se, a thlawn lo a ni," a ti a; hnam pasalṭhate inpekna chu Mizo ṭhangtharte'n an hriat chhuah belh zel dawn tih a sawi.

MNF President hian Thingsulthliaha voter 132 leh Selinga voter 54-te MNF party-ah a lawm lût niin MNF thuchhuah chuan a tarlang.



Share this Post

Login to comment
No Comments