Road Safety Week hman ṭan a ni 2017-ah lirthei chetsualnaah mi 51 an thi

Road Safety Week vawi 29-na chu nimin khan Mizoram hmun hrang hrangah hman ṭan a ni a, Assembly Annexe conference hall-ah Transport minister John Rotluangliana'n a hawng. He hunah hian, kum 2017 chhungin lirthei chetsualna vangin mi 51 an thi tih tarlan a ni.

Transport Minister chuan, Mizorama lirthei chetsual chhan tam ber chu driver thiam loh a nih thu a sawi a, "Fimkhur a ṭul hle. Accident-te hi kawng ṭhatna hmunah te, kawng zau laiahte a thleng tlangpui a. Speed limit neih pawimawh hle a, chu chuan motor tlan chak lutuk tur leh tlan muan vanga hnunga mite tana ninawm khawpa motor khalhte a titlem dawn a ni," a ti.

Mizoramah kawngpui a lian lo a, lirthei a tam si avangin tun aiin lirthei khalhtute an hawihhâwm a pawimawh tih sawiin John Rotluangliana chuan, "Motor dang nena kan intâwk a nih pawhin tlawmngai zawk nih hian nunna tam tak kan chhanhim thei a ni tih kan hriat a pawimawh. Zu rûi chungin motor kan khalh tur a ni lo a, dan bawh chhiatna a ni," a ti a; lirthei chetsual chhan tam ber chu zu leh ruihhlo dang ti chunga motor khalh vang a nih thu a sawi.

John Rotluangliana chuan, driver-te kutah nunna tam tak a innghat tih sawiin, "Cellphone hmang chung leh meizial zu chunga lirthei khalh loin, wrong side-a intlân pelh kan chìn leh mi garage zâwn leh kawng pêng lai taka motor kan dah tlat ṭhinte hi kan sim a ngai. Traffic sign hrang hrang târ chhuahte hi kan ngaih pawimawh a hun tawh a ni," a ti.

Transport Minister sawi danin, India ramah lirthei chetsualna vanga thi an tam hle a, hei vang hian sorkar laipui pawhin road safety a ngai pawimawh a; Group of Ministers on Road Safety Committee din niin Supreme Court pawhin Committee on Road Safety a din phah a ni.

Road safety chungchang ngaihtuah turin state tinah Lead Agency din tur a ni a, Mizoramah pawh agency din a ni tawh a, anni hian road safety-ah chak zawkin hma an la dawn a ni.

Week hawnna inkhawmah hian Transport secretary HL Rochungnunga'n inlawmna thu a sawi a; Transport director R Remmawia'n Mizoram medical statistics enin, kum khat chhunga sikserh leh TB natna vanga thi aiin, motor accident vanga thi an tam zawk thu a sawi.

29th. Road Safety Week hi February 12-18 chhung hman a ni dawn a, Week hman chhungin panel discussion, live phone-in programme leh free medical check-up buatsaih a ni ang.



Share this Post

Login to comment
No Comments