Fire Prevention Week hawn a ni

State Level Fire Prevention Committee bultumin nimin khan Mizoram hmun hrang hrangah Fire Prevention Week 2018 hawn a ni. A hawnna pui ber, Aizawlah chuan Administrative Training Institute (ATI) conference hall-ah Home minister R Lalzirliana'n a hawng.

R Lalzirliana chuan, Fire Prevention Week chu ram chhungah kângmei a chhuah lohna tura inven fimkhur a ṭulzia inzirtirna hun a nih thu sawiin, "Kângmei laka invenna tak tak erawh chu hemi bak, February aṭanga May/June thla thleng, ṭhál chhung zawng kan chhunzawm a ṭul. Mahni lo vah hâl hi ram kâng a ni lo a, fimkhur taka kan lo vah kan hâl chuan ram kâng lakah kan invéng thei a ni," a ti a; Mizo mipuite chu fimkhur leh ram tihkan hlau taka mei kawng uluk taka sial chunga lo hâl turin a chah.

Ram kângin mihringte nunna hnár, boruak ṭha siamtu leh tuihna siamtu ramngaw a tichereu tih sawiin Home Minister chuan, "Ramngaw kan humhalh loh chuan tuihna a kang chat ang a, tui sem tur leh chawi tur a tlem tial tial dawn. Tun dinhmunah ṭhál laiin Mizorama lui liante a kám nasa tawh hle a ni," a ti.

R Lalzirliana chuan, tuikhur leh lui dunga ramngawte phei chu humhalh nasat lehzual a ṭul tih sawiin, "Sorkar, tlawmngai pawl leh kohhrante pawhin hma nasa takin la mek mah se la, a ram neitu, mipuiin kan zawm ṭhat loh chuan kan ram neih chhun kan tichhia ang," a ti a; ram tihchhiat a nih chuan a tuartu tur ber chu a chhunga cheng mipui an nih thu a sawi.

Principal chief conservator of forest (PCCF) Lalram Thanga pawhin thu sawiin, Mizoram chu India rama Chief Minister kaihhruaina hnuaia State Level Fire Prevention Committee din thei awmchhun a nih thu a sawi a, "Fire Prevention Week-ah hian kângmei a chhuah lohna tura inzirtirna ngawrh taka kalpui ṭhin a ni a, Aizawl bakah district khawpui tinah DC-te kaihhruaiin Fire Prevention Week hman a ni," a ti.

Ramngaw chu ei tur, in tur, châkkhai lamna, boruak ṭha siamtu leh tuihna siamtu a nih avangin humhalh tur a nih thu sawiin Lalram Thanga chuan, mipuite chu sorkarin himna tura dan a siamte zâwm turin a chah a ni.

Fire Prevention Week hawnnaah hian minister Vanlalawmpuii Chawngthu, MLA pasarih - RL Pianmawia, John Siamkunga, Lalrobiaka, Hmingdailova Khiangte, Lt.Col. ZS Zuala, K Lalrinthanga leh R Vanlalvena te pawh an tel.

Kumin Fire Prevention Week hi February 12-17 chhunga hman tur a ni a, thupui chu 'Ram tikâng lo turin mi tin i fimkhur ang u' tih a ni.

State Level Fire Prevention Committee hi kum 2000-ah din a ni a, State Level Forest Fire Crisis Management Group leh District Level Fire Crisis Management Group pawh May 2017-ah din a ni. February 2, 2018 khan State Level Fire Prevention Committee ṭhukhawm chuan Fire Prevention Week hman hun tur a ruat bakah, March 15, 2018 aia tlai loah lo hâl vek turin mipui a hriattir a ni.



Share this Post

Login to comment
No Comments