PHE E-in-C pisa sak tur sawifiah

General Administration department (GAD) Zothankhuma chuan thuchhuah siamin, New Secretariat Complex-a quarters type-IV ding mek ṭhiah tum anga puanzar a awm chu thu dik lo a nih thu a tarlang. Hemi chungchangah hian MNF party ṭhalaite'n thu dik lo an thehdarh niin Congress party ṭhalaite chuan an tarlang bawk.

GAD thuchhuah chuan, "Media leh chanchinbu hrang hranga PHE department-in an office tur New Secretariat Complex-a an sak tur chungchanga a bul hnaia quarters type-IV ding mek ṭhiah tur nia thuthang awm chu sorkar chuan a dik lo a ni tih a puangzar a. PHE department office tur hi quarters awmna aṭanga ft. 10-a hlaah sak turin ruahmanna siam a ni," a ti.

Congress ṭhalai, MPYCC pawhin thuchhuah siamin, New Secretariat Complex-a PHE Engineer-in-Chief pisa building tur sak chungchangah MNF ṭhalaiten thu dik lo mipui hriatah an puangzar tih sawiin, an dem tak zet thu an tarlang.

MPYCC chuan, MNF ṭhalaite chu hmasawnna hna thawktute rîkrâp a, an hnathawk lai tharum hmanga an chawlhtirah puhin, "Dan leh hrai palzûtna lian tak a nih bakah, sorkar pawisawina leh ram mipui thamlohna nasa tak a ni. MNF ṭhalaite hi hmasawnna dodaltu leh tiṭhuanawptu an ni," an ti.



Share this Post

Login to comment
No Comments