Mizoramah kawng km. 7,521.302 a awm Mizoram PWD-in km. 6,029.487 an enkawl

Mizoram PWD chuan sorkar kum hmasa, 2016-17 chhung khan Mizoram chhungah kawngpui km. 6,029.487 an enkawl a; chu'ng zinga km. 3,922.529 chu blacktop tawh niin, km. 2,106.958 chu blacktop loh a ni thung. Hetih lai hian, Mizoram chhunga kawngpui zawng zawng thui zawng belhkhawm chu km. 7,521.302 a ni.

Tun hnaia PWD-in an tihchhuah, Annual Report 2016-17-a an tarlan danin, Mizoram PWD hian national highway (NH) km. 1,414.318-a thui an enkawl a, chumi zinga km. 1,178.118 chu blacktop tawh niin, km. 236.200 chu la blacktop loh a ni. State highway km. 170-a thui an enkawl a, state highway an enkawl hi chu blacktop vek tawh a ni.

PWD hian district chhunga kawngpui bika ngaih (major district road) km. 601.400-a thui enkawlin, a vaiin blacktop vek a ni a; district road dang km. 978.300 an enkawl a, chumi zinga km. 769.700 chu blacktop niin, km. 208.600 chu la blacktop loh a ni. Village road km. 1,863.147 an enkawl zinga km. 440.337 chu blacktop tawh a nih laiin, km. 1,422.810 chu blacktop a la ni lo.

Aizawl khawpui chhungah kawngpui km. 297.410-a thui an enkawl a, chumi zinga km. 253.656 chu blacktop tawh niin, km. 43.754 chu la blacktop loh a ni. Aizawl ni lo, khawpui dang leh thingtlang khaw chhungah kawng km. 704.912 an enkawl a, chungte chu blacktop tawh km. 509.318 leh la blacktop loh km. 195.594 a ni.

Mizoram chhungah kawngpui km. 7,521.302-a thui a awm a, chung zinga km. 6,029.487 (80.16%) chu Mizoram PWD enkawl a ni a; km. 896.315 (11.91%) chu Border Roads Organisation (BRO) enkawl a ni. Central PWD enkawl km. 175.600 (2.33%)-a thui leh department dang enkawl km. 419.900 (5.57%)-a thui a awm bawk.

BRO kawng enkawl km. 896.315 zinga km. 609.625 chu blacktop tawh niin, km. 286.690 chu blacktop a ni lo a; CPWD enkawl leh department dangte enkawl ho zawng chu blacktop vek tawh a ni.

Mizoram chhungah kawng tui zawng belhkhawm km. 7,521.302 zinga km. 5,127.654 chu blacktop a ni tawh a, km. 2,393.648 chu blacktop a ni lo thung.

Mizoram PWD hian lei (bridge) 127 an enkawl a; chungte chu - RCC bridge 33, pre-stressed concrete (PSC) bridge 15, built-up steelgirder (BUSG) bridge 25, bailey bridge (temporary) 47, stiffened steel grinder suspension bridge pali leh timber bridge )temporary) pathum a ni.



Share this Post

Login to comment
No Comments