Drug licence 32 titawp

Health department hnuaia Food & Drugs Administration chuan, kum 2017 chhung khan damdawi zawrh phalna, drug licence 32 an titawp.

Food & Drugs Admi­nistration joint director Lalsawma Pachuau chuan zawhna chhangin, dam­dawi dawrte'n damdawi an zawrhte chu mihring tan a him tawk em tih an enfiah fo thu a sawi a; nikum chhung khan damdawi chi hrang hrang sample 267 an endik zingah pathum chu standard quality tling pha lo an hmuh chhuah thu a sawi.

Lalsawma Pachuau chuan, January-Decenber 2017 chhunga damdawi zawrh phalna licence an tih­tawpte chu damdawi ruih theih chi dik lo taka an hralh vang te, an licence huam chin bak an zawrh vang leh licence nei lo hnena dik lo taka an lo hralh chhawn vangte a nih thu a sawi a; licence tihtawp lailâwk pahnih, an thil tih sim tura hriattir zawm lo, a hnua tihtawp a awm tih a sawi bawk.

FDA Joint Directopr chuan, thawktu an indaih lo hle tih sawiin, tunah hian Mizoram pum enkawl turin drugs inspector pariat, food safety officer pahnih leh directorate-a ṭhu pathum, an vaiin mi 13 chauh an awm thu a sawi a; Mamit tih loh district dang zawngah thawktu dah a ngaih avangin, Aizawl bik chauh vil tur pawhin an indaih lo hle tih a sawi a ni. 



Share this Post

Login to comment
No Comments